Tips Mambaen Kue Bolu

Panuturi: Swandy Sihotang

Diboto hamu do kale-kale mambaen kue bolu he? Molo au  najolo tikki dakdanak,  jotjot do hubereng omakhu mambaen kue bolu. Tok tabo ma nian kue bolu on, sai hira mangallang natabo nasohea dope niallang. Je kani sappe hapal do iba, boha carana mambaen kue bolu on, ala sai pinot-notan uma on molo mambaen kue bolu, huhut sai madede ma ijur on… eh tahe tabo ni kue bolu ma tahe.

Tu akka dongan tarlumobi akka dongan na di Pakkat,  naso umbotosa mambaen kue bolu, molo hami najolo adong do carana kale-kale mambaen kue Bolu, songonma carana dohot ceritana:

Parjolo.

Dung juppa ari senen  lao ma tu onan manuhor topung satonga kilo, tolor satonga kilo, gula saparopat adong do gok digadis di onan i. Biasana ala sahali saminggu do onan bah huhut ma manuhor akka belanja naasing persiapan dibasa saminggu on. Molo dekke dang pola tok bahat tuhoron, ai olo busuk annon, so adong dope masa kulkas. Jala muse adong do tiap ari kamis par-along-along sian Barus mamboan dekke iu manang dekke rata. Dung sae belanja, unang lupa lao tu si Diris manuhor TBM, mentega dohot panilli bubuk, ai holan disi do adong i. Tikki i adong do nian di si Doharma alai olo habis, ai tok lakku do tiga-tiga ni halakon. Je daripada nungga nilewatan si Diris lao tu si Doharma hape habis muse ma disi da holan paloja-lojahon nama i.

Paduahon

Dung sahat tu jabu, dipapulik ma dia akka belanja dapur dohot akka belanja naasing. Unang lupa akka belanja nanaeng mambaen kue bolu i dipapulik ma tu lamari kamar: topung, tolor, gula, mentega, TBM dohot panilli bubuk. Molo di lamari dapur dibaen olo digosa huting, manang digosa par-sikkola. Molo ikkan asin, didapur ma dibaen, alai unang lupa dilotophon gembok nai.

Patoluhon

Molo nungga ro tikkina mambaen kue bolu, jala nungga  rade sude akka bahan nai,  dipahembangma amak di tonga-tonga jala dipampeakkon ma sudekna akka bahan-bahan nai di amak i.

Biasana molo nungga ro tikki si songon on di jabu nami na ujui, ittor hundul do au, pa martin dohot si Santoso (si Bamba) di amak i parjolo.  Songon nabiasana ittor si Labamba do dohot makkobasi, ai tok rajin do bayon. Sahat tu sonari pe akka donganna di Medan si Bapak Kerajinan do goar-goar ni bayon dibaen, tamba ni goarna si Labamba. Ittor sai ibana do parjolo paiashon cetakan ni kue on dohot lap, nangpe hurang  iasna. Jala ittor sai  dimuruki on do iba. “urupi oh!!!” ninna huhut dipabondil matana. Ale dialusi pa martin ma: “so huallang i.” ninna “ai allongon ni akka naso marngingi do i” inna muse.

Paopathon

Dung ias sude akka cetakan i jala nungga dioleshon mentega, dibuat ma tolor hira-hira onom biji,  diputtar huhut sada-sada ma dipamasuk tu makkuk nabalga. Dungi dicampur ma muse dohot gula putih toluparopat galas. Baenma bubuk  panilli otik, unang pangodang hu, annon olo gabe pabongkakhu kue i. Ikkon pas do baenon. Dungi diaduk ma nanget-nanget. Songon na biasana ittor kedanhu si Labamba on do nasai naeng berpartisipasi. “Dia au makkokcok” ittor sai ninna bayon do, songon namambuat roha rupani.

Palimahon

Paima diaduk si Labamba tolor i, lompa ma mentega hira 200 g dipanci jala di aduk-aduk. Dung i pamate ma kompornai sappe dang pola tok panas be mentega i. Molo adong hubungan na tu api dah, molo tikki i pa Martin ma biasana nadi lean karejo. Jala tok bangga do abang on, molo didok Uma: “na homa dison, ianggo akka anggimon tok gelleng-gelleng kodo, olo matutung anon tangan nai” ninna. “geser sihhh” ittor inna ibana do pajago-jagohon.

Paonomphon

Molo nungga diaduk tolor dohot gula i,  molo adong pakke mikser, molo dang adong ba pakke sendok ma dikossok. Ikkon sappe mengembang do jala gulana i pe  ikkon sappe hancur do dang risi-risi be rupani terasa molo dikossok dohot sendok i. Dungi dipamasuk ma TBM anggiat apala satonga sendok.

Papituhon

Dipamasuk ma topung dohot mentega cair  tu adonan i, baru dikossok ma muse sappe rata. Dungi tuakkon ma adonan i tu oven  (ale unang lupa jolo diolesi mentega dah), baru pe ditaburi otik-otik topung tarigu sian ginjang.

Pawaluhon

Pagalak ma oven listrik i, putar tombol na adong suratna upper dohot lower ninna sappe suhu 150 derajat. Alai pastihon dang mate listrik dah. Jolo telepon si Panjaitan par-PLN i sukkun jo ibana, atik boha adong rencanana pamatehon listrik sadari i. Molo adong ninna, ampun jo tuan nami ninna hamu, sotung sojadi allangon kue  bolu on annon ala gabe tata.

Pasiahon

Onma tips napaling mendebarkan, jala dang boi so pinahusor-husor pat dohot tangan nang simakkudap. Ai nungga masuk be adonan i tu oven. Tinggal ngongong nama paimahon. Ala nungga tok loja diahap si labamba ala dianggap ibana napaling loja ibana,, ittor sai mangelek do hata ni bayon: “dijo uma apala sasseat jo hucoba” inna ibana tok asi roha rupani mangida. Ro ma uma inna ma: “ehhh dak kodo masak i, tata kodo i ito, ikkon paimaon do 45 menit makkuling saddiri do anon oven, nungga masak nungga masak au haddit ma inna do anon i heheheh, toe lao be ma neh marmeam, ale 45 menit do dah, unang leleng-leleng  sotung sanga habis annon”

Pasappuluhon

Lewat 45 menit, 60 menit, sappe 2 jom….

Habegean ma suara ni Oma jou-jou tu hami natolu….

Ro hami lojong-lojong sian par-pitcean…

Disuru ma huddul tolussa, hona doltuk ma ulu 2 hali be….

Hona lissing ma pat sahali be……

Ai tikki dibukka uma oven i…. tinggal satonga nama kue bolu i hahhahaha

Berita lain ...

• Dung Lam Matua…
• Dirimpu Rumbi
• MANGAN MANOGOT TINGKI SINGKOLA
• Jambar ni Parrasun
• HUTA HUTA DO HUTANAMI