Tangiang ni Dakdanak

Dang piga goaron songon Pendeta i, mar naburju ma tahe tu angka jemaatna, naolo mangajari angka ruasna tu hadengganon, naolo paresohon akka ruasna, manosoi tuparmingguon, mangarahon tu partangiangan, nang songoni tu Naposo bulung, tung mansai diharingkothon amang pendeta on do boha porlu ni sipanganon partondion ni ruasna. Nang tu haporluon ni sikkola minggu di huriana, sai maos do disukkun manang diradoti boha dibaen aka guru-guru singkola minggu i mangajari akka dakdanaki.

Molo binenereng sian umur nian, amang pendeta on dang naposo be, alai ala dijaga do angka kesehatanna, mansai gompis dope amang pendeta on lao manghobasi dihuria na i. Nang songoni ma tahe inang pendeta on, dohot do tong mangurupi amang pendeta on di panghobasionna. Dibaen do songon kegiatan sosial songon na ni totophon sian uluan ni huria i sian pusat, ima manghobasi tu sude akka namasa di huria i, isara mandulo na marsahit, mangapuli akka namarsak roha, jala pasahathon hata ni Debata tu akka na marhabot ni roha. Jala tung mansai ringgas situtu do amang pendeta on lao mangebati angka ruasna na marsahit, manangiangkon nasida asa haru tumibu malum sian angka parsahitonna.

Na marhombar jabu do amangta pendeta on dohot amani Harapan, jala keluarga ni amani harapan on pe sada keluarga na burju do, dipataridahon ma i sian parsidohot na disude kegiatan sosial, nang di pambahenanna molo adong namasa dihuta i, nangpe nian boi dohonon keluarga na baru dope, ala sada dope ianakkonna ima si Harapan na marumur tolu taon.

Na bisuk do si Harapan on, namalo, na pantun jala na malo manghatai tu natua-tua na adong di luat i, jala jot-jot do ibana lao tu jabuni amang pendeta nangkin, ai manjou ompung do ibana tu pendetai, jala amanta pendeta on pe mansai las do rohana molo nga ro si harapan on marmeami tu jabu i, ala tamba ma riburni jabui, ai holan halaki nadua nama dijabu i.

Dinasadari, marmeam-meam ma si Harapan on di alamanni jabu i rap dohot huting piaraan ni ibana, mansai holong do rohani ibana mamereng huting on, sipata di ompa sipata dihaol, sipata disuapi ibana do huting on lao mangan, rap marlojong-lojong do ibana dohot huting on di alaman i. Naso panagaman ni rohana, topet marlojong huting on, tor tompu ma lewat sada kareta ( molo di jakarta didok motoR), hape tor tar tabrak ma huting na on, peak ma huting on nang pe dang marmudari. Tumatangis ma ibana, jala mansai lungun ma rohana tahe marnida huting na i, jala diabing ibanama huting naung peak nakkinon. Bohama mangubati huting on, sai ima ro tu rohana.

Alai, tor lao ma pingkiran ni ibana tu Amanta Pendeta tetangga na i, ala heado do ro amanta pendeta i tu jabuna andorang marsahit amani harapan, amana i. Jala ditangiangkon pendeta i do amanai jala dibereng ibana, marsogot na i, pintor malum jala pintor karejo amana i.

Ditahi rohana ma mamboan huting on tu jabu ni amanta pendeta i, jala diabing ma huting on huhut ma ro iluna, marlojong ma ibana tu jabu ni pendeta on.

“Opung,…Oppung…..” sai jou-jou ma ibana sian luar

“Ahai amang, ahai hasian, boasa tung tangis ho,…?

“Oppung, adong marsahit, tangianghon jo asa malum”

“Ise marsahit?” tor humordit ma Amang Pendetaon ala didok adong marsahit hape sampe tangis-tangis dakdanakon paboahon, jadi tung mansai hordit dihilala rohana.

“Marsahit huting on oppung, ditabrak karena nangkinon” ninna si Harapan

Holan dibege pandita i songoni, bah naeng muruk ma ibana, ala nungnga tor mallobok taroktokna, hape holan huting do marsahit, alai dang muruk pendeta i, ala dibereng dakdanak do tahe, dang jadi simurukan dakdanak narohana.

“Boan ma tuson anggi, boan…” ninna pendeta on.

Alai, ala ‘gondok’ ni rohana, jala so hea ibana manangiangkon pahan-pahanan, jala naso hea dope i tarbege sa, jala na so sun dibereng pendeta on halak manangiangkon huting, bingung ma amanta on, alai didok amangta pendeta on ma tangiangna songonon…..

“Ale huting, Bah molo naeng Mate do ho, ba mate ma ho, molo naeng malum, malum ma…..amen” alai dang songon na martangiang tu Tuhan i dibaen, alai bohama asa loas rohani si harapan i.

Dibalik mingguna muse, dung saminggu, sai diparrohahon si harapan ma huting na i, hape gabe malum do, jala nunga boi muse marlojong, nga boi marsuara, jala tung mansai las ma tahe rohani ibana mamerengsa, dang mate hape huting i. Jago do tahe tangiang ni oppung pendeta i ninna ibana dibagasan rohana. Siala las ni rohana, naeng didok rohana ma mandok mauliate tu Amanta Pendeta i, jala paboahon nga malum huting i.

Lao ma si harapan muse marlojong-lojong tu jabu ni amanta Pendeta i, jala sai dituktuki ma jabui.

Dijabu do amanta pendeta i, jala hatop ma haluar ibana disi dibege adong manuktuki, jala las situtu rohana ala si harapan do na ro, alai amanta pendeta on songon na pake baju panas, dohot akka tempel koyok/salompas, huhut marsyal (dililitkan dilehernya).

“ahai opung” ninna Pendeta on manukkun,

“Nunga malum be huting i oppung,…..” ninna si harapan paboahon jala dilean ma buah, didok ibana tongosan sian natorasna, jala dijalo amanta pendeta i ma kiriman i.

“Oppung, boasa marsalompas oppung? jala boasa marbaju panas?? ai so ngali ari ari” ninna si Harapan manukkun.

“imadah hasian, kecapean oppung, nantoari marjamita sian huta na dao, hape hona udan”

“Hu dampol ma ho oppung ateh” ninna si harapan huhut hehe ibana, jala las nai tutu roha ni amanta pendeta i, ai dang piga dapot ibana songoni dakdanak burjuna, nang pe dang margogo tangan ni dakdanak i alai holan mamereng pangalaho i, nunga tung malum sahit ni pendeta i.

“Oppung, nanti aku doakan juga yah, asa hatop malum” ninna si harapan muse, jala tamba ma tahe serom ni amnata pendeta i.

“Martangiang ma hita oppung” ninna si harapan muse, huhut dilippat tanganna, jala sipapitpit matana, songoni ma tahe amanta pendeta on.

Jala didok si Harapan ma diatngiangna i “Ale Oppung Pendeta, Molo Naeng Mate do, mate ma ho, alai molo naeng malum do, malum ma ho, amen” huhut ma serom si harapan, las rohana

Holan dibege amanta pendeta i songoni, tarjolma ma ibana, sai di ingot-ingot ma ai ise mangajarhon tangiang i? di ingot ibana ma tangiang na nadi minggu na lewat, gabe mekkel ma ibana dibagasan rohana.

@#@ Sipaniru do anak, apalagi masa balita, apa yang dilakukan orang dewasa itulah yang ditirunya,….

Tulisan yang sama:

• Di Langgatan Pe…
• Ai dison do hape hamu amang?
• Iteng,…tibbo ni sakkotan
• babaniamanion
• Riwayat hidup