Surat tu Dainang

August 1, 2010 | Filed under: Cerpen | Posted by: admin

Surat tu Dainang
Oleh : Amani Hope Lumban Gaol,
Sumber : Terjemahan bebas dari buku Cermin Kaca Retak, karangan Tulang Laris Naibaho

Jakarta, 16 July 2008

Tumopothon, na huparsangapi jala na huhaholongi, dainang pangintubu

di huta

Horas ma inang nauli basa, na lambok malilung, naburju…
Hipas do hami dison, au borum dohot helam, songonima nang pahompum na tolu i, si alex, si si Bram nang si Tikkos, hipas-hipas do hami dison, suang songoni ma nian ho pe inang nabasa, nauli lagu, sai anggiat ma dibagasan pangaramotion na sian Tuhanta pardenggan basa i, na mangalehon akka hahipason dohot ganjang ni umur di ho inang nauli lagu. Jala dipadao nasa parsahiton sian pamatangmu.

Inang Naburju,
Nunga tung masihol hian hami tu ho, Inang,… Ai takkas do diboto ho, nunga lima taon hami dang ro mandulo ho tu huta, jala pahompum pe, lumobi siappudan i–si Tikkos nunga masihol marnida oppungna, toho do i inang. Alai alani godang ni ulaon, nang alani parsiajaran ni akka pahompum on, dang boi dope hami mulak mandulo ho inang. Mardomu muse, helam pe na baru diangkat pe gabe pejabat di kantor pajak di Jakarta, jadi tung mansai sibuk situtu do hami nuaeng, dang marhasoan.

Inang Nauli basa,
Ia pahompum si Alex, ima pahompu siangkangan i, nunga be masuk kuliah ibana di Pelita Harapan, jala las do roha marnida, ai di haburjuhon ala dihagiothon do namarsiajar i. Molo binereng sian sitta-sittana, ikkon mambuat S-3 manang doktor do ninna di Australia ibana, las roha tutu inong, jala ho pe inong, las ma roham mambege i, ai gabe jolma na hasea do hape annon pinompar mon. Angkup ni i, mulai saonari nunga be hudepositohon hami tu bank hepeng nami, asa dung tammat ibana lima taon nai sian Jakarta on, adong modal pasikkolahon tu laur negeri. Tinaottaon ma jo inang, asalma tulus sude sitta-sitta ni pahoppu mon.

Inong,
Aongoni do nang pahompum sipetonga, ala dang olo talu ibana tu abangna, ikkon di Singapura do ibana ninna sikkola SMA, jala songon natua-tua na bartanggungjawab hami, huoloi hami do i. Asa ummaju ibana sian hami. Dang talu anggo hapistaranna tu sihahaan i. Alai, onma sada nai pangidoanna, nang pe kalas tolu SMP dope ibana, nunga dipangido ibana sada Mobil dalan-dalanna, ujungna di patulus helam do pangidoanna i, nunga dituhor sada mobil ima mobil Terrano sisaonari i, tole ma naroha, asalma burju sikkola. Ai nunga sai madersa ganup ari. Nian saleleng pe nunga binaga-nagahon i, ai anggo mobil na pinakkena na somal nunga ruhet-ruhet, bohama mobil Japang.

Asing muse do pahompum siappudan on, dang olo be mamakke sedan BMW na bekas na hutohor hami na taon na lewat, didok ibana, diparekkeli donganna sasikkola do ibana ala dipakke sedan na leleng, jadi terpaksa ma hu cicil-cicil sada BMW nabaru sian showroom an, ipe asa songon na denggan huida bohina lao tu sikkola.

Inong na lambok malilung,
Ai diingot ho dope tahe, tikki ro ho tu Jakarta on? ima lima taon na salpu? tikki i hea hupatuduhon tanotta na di Cibubur i? ima tano na 2 hektar i?. Nunga dipature helam be sada jabu disi, ninna molo matua muse asa adong ingan parlape-lpean, jala molo ro inong sian huta asa songon na tenang tinggal dijabu, ala takkas diboto ho inang, molo inagan nami sisaonari, ima huta Pondok Indah on, tung mansai rame hian be. Guttur. Dang sonang iba modom. Jala minggu na ro, naeng ro do martamue, atasan ni helam tu jabutta, ima Dirjen Pajak sisaonari. Jadi attusi inang ma ai ila do roha molo songon na so suman jabu manomu akka pejabat ni negara on. Jadi sude akka perabot nang hiasan na di jabu i nunga huganti pe dohot nabaru, jala kolam renang nadipudi ni jabutta i pe nunga hubaen jala hupabolak sampe tu opat meter nama bolakna. Jala hubaen do sopo-sopo di tonga ni taman nadipudi ni jabu i, ai dipangido pahoppun siampudan i, molo ro donganna asa tu si nasida marpungu.

Inang naburju,
Marsogot, arisan do dijabu, ima akka arisan ni istri ni pejabat. Jala asa unang maila au inang, borum nasasada on tu akka istri ni dongan ni helam, bah nunga hutuhor be berlian horung dohot sibong mas. Molo di ingot inong i, hea tabereng di Mall Pondok indah, songoni do inong sipata, asa unang maila iba.

Jala helam pe, ai sadalan do dohot tu umur, didok ibana, dang soksok be ibana mamakke Mobil si saonari, akkup ni i, nadi bulan na salpu i, diganti ibana do mobil na i gabe merci na imbaru nama. Jala, ala sude do hami luhut nunga marmobil, ikkon pabolaok nami nama garasi ni jabutta i, asa muat sude. Jala tamba ma pembantu lao manussi mobil on, dohot tukang taman saonari dijabutta on.

Inong na lagu,…..
Songoni ma jo barita sian hami borum dohot helam, ala tung mansai godang do pengeluaran nami di bulan on, bah marpanganju ma ho inang, DANG TARBAHEN HAMI DOPE MANGIRIM BALANJOM bulan on, ai sian pensiun ni Bapa i ma jo pakke. Hurasa sukkup dope di inang i, so pola sadia be akka kebutuhanmu di huta. Jadi sotung unang pola boha roham inong, ala so boi hami mangirim tu ho bulan on, na lagi menipis do keuangan nami, hape Depsito jala bungana na adong di bank pe dang tarbuat dope.

Sai Tuhanta ma namandongani hita ganup ulaonta, amen

Borumu,

NaiHolitMangging nyonya SIpanggaron

NB :

Adong hape na lupa inang
-Dang di Jakarta hami dua minggu na ro on, alana naeng lao hami marlibur, mardalani tu Bangkok dohot tu Sanghai, China. Tangianghon hami inong, asa hipas-hipas mulak tu Jakarta.

Berita lain ...

18 Responses to Surat tu Dainang

Garth M. Meha July 16, 2008 - 05:15

pangurupi nami pe inong, mar laptop do.

#Appara HH,….didok muse, baby sitter ni pangurupi nami pe mar mobil do

> | >> | Balas Komentar ini | Quote
[Balas...]
swandy sihotang July 16, 2008 - 10:21

hurasa pittor mate toltol do ra inongnai manjaha surat ni boru nai. hape inongnai nungga sai tarpaima-ima ditongosan ni borunai anggiat apala masi napuranna.

Toe be ingot be mangirim agiat apala sasaotik tu huta.

Horas,

swy

<< | < | > | >> | Balas Komentar ini | Quote
[Balas...]
Risma P:
August 4th, 2010 | 09:54
Kwakakak kaka hahah totltol au mekkkeel manjaha komentar mon Opung.. hihihihi kakakak, hape iba nungga emosi manjaha.. dung hujaha komentarmon toppu meledak ekkelhu sampe ro ilukku,, Sapooooooot ma boru sisongoni.. akke..Mangido Tangiang kodo naeng marlibur tu Hongkong.. teck dakkian be sitangiangkonontoni..sapot mai

<< | < | > | >> | Balas Komentar ini | Quote
[Balas...]
Singal July 17, 2008 - 06:11

Sega sude, sega…segaaaaa…sai taingot turi-turianon…eh sipaingoton…anggiat boi dapot angka naummuli tujoloanon….Alai parbada do ra Nai Alex on ate?!

<< | < | > | >> | Balas Komentar ini | Quote
[Balas...]
leonard July 17, 2008 - 07:16

Horas,
surat i dang sidung dijaha inang i, alana pittor humalaput do ibana marhobas lao tu kantor pos manukkun wessellna… sahat di kantor pos disukkun ma tu parkantor pos, par kantor pos pe gabe bingung, wessel aha inang, ninna…ro inang i mandok muse, wessel ni borukku na sian jakarta i. Bah, dang adong dope sahat inang, mungkin marsogot…mulak ma inag i tu jabuna….sahat di jabu, di bukka ma museng nanget surat ni boru nai…manganguki ma inang i manjaha isi surat ni borunai……
salam
leonard

guriapus ma i…..

<< | < | > | >> | Balas Komentar ini | Quote
[Balas...]
Togar Sidabutar July 17, 2008 - 11:30

Suhut-suhutan / turi-turian do nian i, alai olo do ra adong na sisongon i. Adong do naeng par Pakkat si songon i ? sai unang ma nian adong akke

<< | < | > | >> | Balas Komentar ini | Quote
[Balas...]
hh July 17, 2008 - 14:19

Inong nalagu naulibasa, baru ro dope e-mail ni simatuangku sian Jerusalem, ai mardalani do nasida saonari tu san rap dohot anggi nami siampudan i sakeluarga, maksud nasida naeng lao dope halaki tu Turki, sian i muse kaliling Eropa, asa sekalian ninna, aut sukkup cuti ni anggi nami i, naeng tu Canada dope ninna halak i, ai jonok nama sian Inggeris i.
Helam do mambiayai on samudekna inong.
Inong, na tung tuani do dang apala diantusi ho na mardalan dalani i, molo dipangido ho annon mardalani hape dang di lehon helam, hansit annon roham.
Sai adongma jolma panongosan na mulak tu huta inong, hu titiphonpe saotik annon, asa adong laho manuhor possal dohot sendor molo lao ho maronan.
Bah, nga lam rarat ate.

<< | < | > | >> | Balas Komentar ini | Quote
[Balas...]
rihardi tinambunan July 18, 2008 - 00:51

Ai nau-nau nei ho tokke…??? Dang holan marudut-udut, alai ungnga mangararati songon urat ni andor…..he…he…he….
(dao-daoma pangalaho nasongoni sian diritta akke..)

<< | < | > | >> | Balas Komentar ini | Quote
[Balas...]
Tokke Latteung July 18, 2008 - 01:04

@Amang Sidabutar,….
Ai yakkin do au anggo dongan parpakkat, dang adong songon suhutan ai akka jolma na burju-burju do sude.
Naeng ma nian, tutu alani ni naso adong sibaenon do, gabe dang boi iba mangirim, unang alani gabus.

@Appara PArkanada,….
Molo dibaen songon nanidok mi apara, berarti adong pardikkanon tu namarnatua-tua,…dao-dao ma i ateh.

@LAe Rihardi
On akka kisah nyata do on, as boi tabahen gabe songon sumber inspirasi di ngolutta ima namarnatuatua….dang mangararati…heheheh

<< | < | > | >> | Balas Komentar ini | Quote
[Balas...]
Tommy M J Sihotang July 18, 2008 - 12:25

Nungga tok jim hian ni….bah kale-kale. Awas hukum alam….sotung gabe batu annon, manang ro tsunami.

<< | < | > | >> | Balas Komentar ini | Quote
[Balas...]
Lismawati Hansel - Sinaga August 2, 2008 - 15:20

Je kisah situtu do on?
Ai hurippu nakkinon holan sada Satire…

Ai nga tok mamunjung tutu nai Alex na lonong i bah..

<< | < | > | >> | Balas Komentar ini | Quote
[Balas...]
Hendry Gaol September 4, 2008 - 01:33

Untuk kesekian kalinya, saya kembali terima tulisan ini mampir ke email saya, dengan format dan tokoh yang semuanya dirubah….o tahe bah….

<< | < | > | >> | Balas Komentar ini | Quote
[Balas...]
Tommy M J Sihotang September 4, 2008 - 02:07

Tokke, berarti nungga di bajak hak ciptam akke, bah.. On ma ala ni mura-mura ni na marcopy paste i.

Toe ma, asal ma sahat mora-moral ni sarita i, ido na paling utama.

Horas

<< | < | > | >> | Balas Komentar ini | Quote
[Balas...]
Risma P:
August 4th, 2010 | 09:59
Setuju Opung.. komentarmon,, jangan pernah menyerah berbuat yng baik,, ini bisa menjadikan Jamita tu akka namanjaha,,, maju teruus.. sukse untuk Penuliss… salam

<< | < | > | >> | Balas Komentar ini | Quote
[Balas...]
Hendry Gaol September 4, 2008 - 02:19

olo bah abang bah….na lobih hebatna, sude mandok “jaha ma jo suhutan on” termasuk ma sian beretta si lena……

memang molo nirimangi do suhutan on, tung godang dope halak na sisongon on, tarlumobi ma di huta na ribur on. ai iba sandiri pe, nga piga bulan on, dang hea be nanggo mangirim pulsa.

Dung launching tulisna on, jalo do dipasingot Tlg. LAris naibaho, pulsakku bulan on dibagu dua, satonga ma tu huta ninna…unang holan manurat binoto!! hahahahaha

<< | < | > | >> | Balas Komentar ini | Quote
[Balas...]
Tommy M J Sihotang September 4, 2008 - 02:28

Hahaha….berarti on goarna sarita na marpangait, katua….hehehe..

<< | < | > | >> | Balas Komentar ini | Quote
[Balas...]
goktua sihotang August 7, 2010 - 21:10

hebat nai ra i ,,,, nai alex on… buriapus mai bah… jauh-jauh lah yang begituan… na pamer nama i disi… songon pepatah mengakatan.. rendahkanlah dirimu serendah mutiara di dasar laut…

<< | < | > | >> | Balas Komentar ini | Quote
[Balas...]
st drs timbul panjaitan October 9, 2010 - 07:16

Syukur nai Alex masih ingat minta di doakan Ibunya dan mudah2an ibundanya itu baik mendoakannya dipodaman lage tiar naung maribaki, asa diribaki Tondi Parbadia i roha dht pikkiran ni nai Alex i

<< | < | Balas Komentar ini | Quote
[Balas...]