Singa Vs Atheis

Marmassam do ragam ni jolma diportibion, adong do na burju adong na jahat, adong do na marhaporseaon tu Debata, alai adong do naso pola di haringkothon marhaporseaon. Molo jolma naso olo marhaporseaon tu debata didok ma i atheis, jala atheis on pe tahe tong dope dibagi manang piga bagian na asing, alai na porlu botoon sian sude massam-massam ni atheis on ima dang dihaporseai na adong Debata, dang diparhatutu ibana sude nasa na adong ima najinadihon ni Debata. Marasing do atheis tu aliran kepercayaan.

Godang do nuaeng on sisongonon, tarlumobi ma tahe molo nga dibereng sude akka namasa na ro tu portibion, ro akka aek na sumar, ro akka alogo na gogo, ro akka aek laut na margumalunsang, gebe tamba ma antong pos ni roha nasida naso adong tutu Debata. Sai olo do nasida mambaen akka sipalensem tu na manghaporseai debata. “Ida ma nai, anggo adong Debata, dang pa ro on na aek nasumar i” ninna na deba.

Nang songoni do sahalak baoa disada luat na ribur, ibana ma namargoar si Jugul, ai holan sian goarna ma sian nunga boi tarida haroha onna, ai goarna do dai na. Ia si jugul on, sasintongna sahalak kristen hian do, alai ala nunga leleng ibana marjalang di luat sihadaoan, ima tu luat ni nagodang akka atheis gabe dohot ma ibana sahalak na marpikkiran songoni.

Sai diaarahon ibana do jolma na dijumpaina marhata, laho patuduhon didia ma Debata i, patudu majo ninna ibana tu angka donganna. Di nasahari partingkian, laho ma ibana mardalani tu sada inganan, ima songon Kobun BInatang na tung mansai godang akka Binatang Liar, ima na pinapungu ni pamarenta sian akka harangan asa unang di buru jala di pamate akka jolma i. Di inganan i ma ibana mardalani dohot akka donganna, jai sai dipatorang ibana ma boha asa masa songon na nidokna Evolusi ni akka binatang na adong diportibion mulai sian juta taon na salpu, jadi didok ibana ma “dia do parjolo ditompa Debata muna i, manuk manang tolor ni manuk??”

Tung mansai las ma rohana molo so boi dialusi angka jolma na i nasa sungkun-sungkun na taringot tu hadebataon. Naso panagaman ni rohana, malua ma sada Singa nabolon, ima singa baoa, namansai ganjang ngingina, sai dipatudohun singa on ma ngingina tu si jugul, ai lao pamateonna nama ibana jala nunga naeng si rongom singa on sijugul on.

Lao ma rohani si jugul on ima, hu uji jo debata ninna ibana dibagasan rohana, nang pe nunga mansa humitir ibana. Dungi di jouhon ibana ma ” O Debata, didia do Ho?”. Naso panagaman ni ibana pittor so ma sude akka namasa, so ma alogo, so ma soara, so ma jom tanganna maroutar, jai dibege ibana soara sian ginjang ” Au ma na marhuaso disandok Tano on, boasa jou-jou ho?”

Nang pe nga dibege ibana songoni dang mabiar ibana, sai tong dope umbiar ibana mamereng Singa na male itu, dang jalo tor mangaku tu rohana, nion ma Debata, mangido maaf ma au asa paluaon ononna au, goar ma daina, bohama si jugul, dang olo ibana mangido tolong asa dipadao ibana sian parmaraan ima sian nanaeng soroon ni singa ibana.

Alai Di ingot ibana ma molo halak Kristen diajarhon do asa unang mamunu, ima patik paoomhon i, asa massihaholongan nasa natinompani Debata, songon na tarsurat di bukku nabadia i, jadi lao ma roha ni ibana laho mangakali Soara na ro sian ginjang i. didok ibana ma, “Ia bahen ma jo singa na dijolongkon gabe halak Kristen” ninna ibana, aut sura nian porsea ibana di Debata, ra dohononna ma , “palua ma au sian pangago”

Marsoara ma muse sian ginjang, “Jadi ma nanidokmi,…….. ale singa gabe Kristen ma ho”

Dungi tordibereng ibana ma singa na bolon na male i Marloppit tangan dohot marloppit pat, dungi unduk, jala dibege ma tor makkatai songon jolma singa i, jala martangiang ma singa na bolon i didok ma

“Ale Tuhan Debata, Pasu-pasu ma sipanganon on naung rade dijoloon, asa gabe tau sibuk tu pamatang nang tu daginghu, Amen….”………………………………………… tangiang lao mangan do hape…

Berita lain ...

• Dung Lam Matua…
• Dirimpu Rumbi
• MANGAN MANOGOT TINGKI SINGKOLA
• Jambar ni Parrasun
• HUTA HUTA DO HUTANAMI