Saleg Nabisuk……

oleh: Monang Naipospos / http://tanobatak.wordpress.com
ide cerita : Hendry Lumbangaol

Tung loja do roha ni si Banggua Hasiholan patuduhon dirina anggiat tarpillit nian gabe anggota DPRD di luatna. Godang do ragam ni angka partanda patuduhon hadirionna dipatupa asa anggiat marlapatan nian sangkap ni rohana i.

Ianggo angka natuatua di hutana i nunga tangkkas dipandohanna ia si Banggua Hasiholan tardok ma sada SALEK. Ba ibana ma tapillit, ala anak ni hutanta, sian gomparan ni ompunta, ninna be do. Pos do antong roha ni si Banggua Hasiholan di angka pandohan i na ingkon sada do roha ni nasida be.

Marungkil do si Banggua Hasiholan laho pararat barita i tu hombar balok ni luatna i. Alai ro ma alus tu ibana naung adong anak baga-baga ni nasida dipajolo. Tu piga luat ibana lao, sai songon i do hata na ro tu ibana. Muningan ma rohana, bah boha ma gogo ianggo holan mangasahon na dihutanamian do, ninna rohana.

Bulan hurung lobilobi, samisara purasa buhu ni bulan. Sai niluluan soara manggohi, anggiat saut sangkap dapot na niluluan. Songon i ma si Banggua Hasiholan mampar songon hortuk tu dolok tu toruan, anggiat saut sangkapna gabe anggota dewan. Alai dang simanuk-manuk sibontar andora, ndada sitodo turpuk siahut lomo ni roha. Tarsonggot muse ma ibana dung dibereng ibana Ama ni Mardongan, amangudana sian ompu ni amana martinodohon pahembang tanda partai na asing diharbangan ni hutana.

“Dia do pordam amang porda di siagalangan. Dia do sangkapmu amanguda mambahen au tu paralang-alangan?”, ninna ibana ma tu Ama ni Mardongan.

“Ah… nunga songon horbo jinail au hasian tinogu tu lahatan. Dang na tardok ungkil ni rohanku umbahen au dang marhasoan”. Dipaboa ma na ro simatuana mangido asa ditungkoli laena na dohot salek, ima si Dondon Tua anak ni simatuana sian ompung martinodohon. Ingkon adong ma nian 50 soara lehononna asa boi pate hauma pauseang binoan ni pardijabuna uju dipatua hata di pangolina najolo.

* * *

Di partuaon ni Ompu Julonggo nagabe i, mulak do si Henry sada sian pahompuna sian Jakata. Rosu do pardonganonna dohot si Banggua Hasiholan uju di haposoon nasida di huta. Marhaha do si Banggua Hasiholan tu si Hendry. Dihatahon si Banggua Hasiholan ma sude arsak ni rohana na so boi sude marsada gomaparn ni ompu nasida binahen ni Ama ni Mardongan nananungloli parjongjong ni laena.

“Pos ma roham anggia, ta atur pe”, ninna si Hendry.

Las ma roha ni si Banggua Hasiholan umbege alus ni si Hendry i. Ditogihon ma ibana mandapothon Ompu Marsinta, anggi boru ni Ompu Julonggo. Dihatahon ma sude sangkap nasida. Dipangido ma asa marpaula songon na hasoropan Ompu Marsinta di ulaon partuat ni Ompu Julonggo. Disolothon si Banggua Hasiholan ma sanggomak sihumisik tu tangan ni Ompu Marsinta.

Uju di tortor paniaran, marpaula ma songon na naeng tinggang Ompu marsinta jala hitir-hitir dagingna. Sigap ma angka ina na di lambungna i mangarabin ibana asa boi muse mulak denggan jongjong. Dipaegal ma panortorna, asing sian na somal. Na sorop do ompunta parsadaan, ninna saida be.

Dung dibereng songon na marpaima sude natorop i, mangkuling ma ibana. “Horaaas”

“Horass ma tutu ompung”, ninna natorop i.

“Mardame-dame hamu daaaa…”

“Olo, ompuuuung”

“Marsada roha hamu, daaaaa”

“Nauli ompuuung”

“Adong do huboto sian hamu salek….masitungkolan hamu da”

“Olo ompuuuung”

Dung dipaherbang tanganna songon na mamasumasu tu natorop, marudur ma nasida be manjonok tu jolo ni Ompu Marsinta huhut manoirtor. Dung jonok Ama ni Mardongan, tompu ma dilotak Ompu Marsinta ibana dohot rambu ni ulosna huhut disonggak; “Jora doho?”

“Jora ma au ompuuuung……..”