Riwayat hidup
Tutu ma nian tarida do ia OppuJamordong sahalak na parsaor uju di ngoluna. Tung mansai godang do na manghalungunton di parlaona i. Tarida do sian na tung mansai godang do na ro manjomut. Sude do akka loloan na torop manghatindangkon hinaburjuna i. Godang do na marabur ilu patuduhon habot ni roha na tung mansai bagas.
Nung tung mansai loja OppuJamordong boru na sai tumatangis i. Ise na so lungun tahe molo nunga marsirang badan di portibion. Godang do ro akka sisolhot nang dongan sahuta mandok hata togar-togar alai mangau tu roha na be do, nidopho roha jala mangau tu diri na lungun do na disirang hamatean.
Mangkuling do music songon na mangariburi akka dongan sahuta na mandungo I borngin i. Jala sude do nasida paimahon amani Jamordong sian Jakarta, ima anakna panggoran i. Sude do dongan sahuta mangiburu tu holong mangiburu tu nadenggan dirohani sasude ganup dongan sahuta i.
* * *
“Imadah lae, nunga tung namartua hamu tahe, hamu do si tiruon dihuta on, ai nunga dibereng magta nunga dibereng roha, natua-tua do hamu na tarida sian naung denggan sude pomparan muna, dapotan passarian jala nunga sude marhasohotan,,” ninna AmaniManorgang.
“Dia ma dohonon laekku, ai pas-pasu ni Debata do I sude,…..”
“Olo Lae, ai molo binereng sian umur muna nian nunga onompulu tu gijjang, alai moho sian pamatang do, ba talu do iba na opat pulu on” ninna AmaniJanggalatung, huhut di padalkan saturna i.
Molo dapot botari, massai ribur do jabu ni OppuJamordong, sai rodo akka hombar balok laho marnonang, paomat sahalak dua halak, ia so mar-koa, ba marsatur ma, manang paima lao nasida tu pargurendean di gareja.
Nang OppuJamordong boru pe tung mansai las do rohana, molo godang ro akka hombar balok i tu jabu, asa ribur-riburan nasida nadua. Ai dung marlaoan be akka anakna na tolu i, tung lungun-lungunan do dihilala nasida, tarlumobi ma dung passiun OppuJamordong. Anggo sian siadongan nian, sae do allangon nasida olat ni na mangallang gulamo rata do nasida na tinaruhon ni paralong-along ganup ari senen i.
* * *
Marsoring-soring do na ro, marsoring soring muse do na pasahathon andung nang tangis na be, sian dongan sakarejo, sian huria nang sian dongan parkarejonna pe tahe. Tung hordit do rohana sida di parlaoni OppuJamordong, ai di ida nasida dope tung mansai hipas do ibana andorang i. Jala dohot dope imana pariburhon pesta demokrasi ni negara on.
Nunga singkop be sude, nunga ro anakna na tolu i, jala nunga di tiop amanta pandita bukku liturgi lao pasingkophon ulaon parborhat ni OppuJamordong on. Nang songoni sude akka adat nahombar tusi nunga sikkop be sude di ulahon. Mulai sian na martonggo raja sahat rodi na pasathon adat na gok tu hula-hulana.
“Nunga sikkop be sude??” ninnna amanta Pendeta on, huhut songon na di padenggan dasina na bottar i, asa songon na tigor idaon tu toru.
“Nunga be amang….” ninna sahalak hasuhuton bolon.
“Attong marende ma hita…” huhut ma mardalan ulaon huria i dohot denggan.
“Andorang so sahat tu jamita na jeppek, tabee ma jo dijahahon hasuhuton songon riwayat hidup ni amanta OppuJamordong on”
Pittor hatop ma hehe AmaniMArlina, siappuidan ni OppuJamordong laho manjahahon songon riwayat hidup ni among na i. Di dadap ma sakkuna jala di parade harotas i.
“Amanami, inan nami tarlumobi ma raja ni hula-hulanami, raja ni tulang nami, nang tusude dongan sahuta, attong hujahahon hami ma songon riwayat hidup ni damang on, dang manghatindanghon hamaloon, hamoraon nang hasangapon nami, alai na patuduhon holong ni rohanami do…” ninna muse huhut ma songon na lungun idaon bohina i
Dijaha ma muali sian partubuna, sahat rodi ulaonna nang songoni taringot tu parsaripeonna.
“Nunga tung godang di ula amanami on andorang di ngoluna. Di taon 1999 dohot do amanami on gabe sada calon legislatip sian Partai Daloihan Natolu alai songoni ma jo hasilna dang tarpillit ibana.”
Di apus amaniMarlina muse iluna na mantek sian simalolong na i.
“Dohot do damang on caleg sian Partai Nasomal, alai ima jo tikkina, tong dope dang marrokap ibana gabe wakil rakyat i, nang pe nunga tung godang dibaen ibana na denggan tu donganna sahuta”
Songon na marhosa jo amani marlina.
“Ia damang on, na burju do songon na dihatingkon muna i sude tu hami, jala dang na paboahon hamurjuon ni damang on. Songon na hudok hami di gijjang, tolu minggu na lewat, rap mangan indahan na las dope natua-tua on dohot sude dongan sahuta dison. Toppu do parlaoni damang on. Dang adong songgop sahit tu ibana. Dohot dope ibana mamillit di pemilu na lewat, alai dua ari sian i tor hona penyakit jantung ma ibana. Tor toppu ma mate dangingna sambola.”
Sip satokkin
“songoni ma jo riwayat hidup ni amanami on hu jahahon hami…..mauliate ma”
. .. . . . . . . . . .
ide suhutan : timtryout2009
Tulisan yang sama:
7 Komentar pada tulisan “Riwayat hidup”
Komentar anda pada tulisan ini
ONLINE
hardi purba :
Biasana paidua ni suhut ma manjahahon i di alaman
. Asi ni roha i tu keluarga ni Oppu Jamordong i ate. Nungga godang na terjadi nasongon on, tarlumobi ma di negaranta on. Godang dope jolma gabe “saleg” manang “Cabub/Cawabup” laho mangalului mangan. Sabotulna dang layak dope kemampuanna secara ekonomis, alai diulahon. Molo monang do jala dapot “kursi” i, bah tabo dope boi “mulak modal”. Alai boha muse ma molo talu?……kursi dewan dang dapot gabe kursi roda ma na ro. Sada pelajaran na arga do on dihita tarlumobi di par-Papatar, dang namangorai gabe dohot mencalonkan, alai tabereng ma kemampuan di sude hal, termasuk kemampuan ekonomi. Unang gabe sahit haduan na ro molo talu. Di daerah Jawa Timur an hea do binege sampai gila ala talu amanta i di pilkada. Jabuna nga targasis jala marutang dope ibana ratusan juta. Terganggu ma jiwa na.
Alai molo mampu do tutu bah nauli, lanjut!.
Mauliate ma di panurat i, Tokke Latteung.
Horas.
[Balas...]
Elephant stone:
April 9th, 2009 | 13:29
Molo mate sabbola, ba hasuhuton bolon do attong ra Bapa manjahahon riwayat hidup, je molo mate dua bola / mate sude (atas bawah, kiri kanan muka belakang)paling jonok mai suhut paduahon. attar songoni do beasana binereng. teeeeeeeek nga tok jim i….!
[Balas...]
latteung:
April 11th, 2009 | 16:21
hahahah…ai dia do jolma, majjaha riwayat hidup ala mate sabbola daging na??…nga tok jim i dah,..ikkon mate do mulai sian obut sahat tu tambihul na
[Balas...]
Sutorus. L :
Molo dipaihut – ihut cerita , songon nalungun do nian roha.. alai adong saotik na erget dirohak ku… ima riwat hidupni oppu Jamordong…Tor toppu ma mate dangingna sambola.” ai molo holang sambola do mate dagingna boasa pola di agendai akke…
alana mangoludope dagingna nasambola nai
on ma goarna cerita..lungun mulana…lucu ujungna
horas…
[Balas...]
jaullus (raja mullusullus) :
Mauliate ma di amanta Tokke Latteung, sada suhutan “kritik membangun” doi suhutan i molo ta padomu tu na masa saonari, lumobi di pemilu legislatip nuaeng. sai hira na marrongom do caleg i marsigulut lao mambuat roha ni ankka donganna asa nian di pemilihan onasa tar pillt ibana gabe hundul di legislatip nang di DPR, DPRD dohot DPD. Alai apala naso di paretokkon ankka dongan caleg, ima godang ni na ma millit di sada Dapil. molo tabereng ma di Dapil Jakarta Timur, 50 – 60 ribu do halak hita, molo sude mamillit hape godang ni caleg halak hita 350 halak. asa boi sasahalak manghunduli kursi legislatip ikkon papunguonna ma soara sagodang ni 14.000. (menurut aturan ni KPU) hape pamillit na potensial tu caleg halak hita, tong do halak hita i. da, sargang ma annon sude halak batak na caleg i? godang ma annon songon Oppu jamordong. je molo masa annon songon i unang ma pola di agendai akkeh! jolo mate hian ma asa di agendai. je siap-siap ma akka parbisnis lao massediahon kursi roda.
[Balas...]
Elephant stone :
Sebenarna mampu do nasida sude huddul di kursi jabatan i (apalagi molo hollan modom manang “paduan suara” songon ende ni Iwan Fals). holan rakyat i do naso olo mamillit nasida.
[Balas...]
YULINDA :
kwakakakaaa bursikmai bah amani marlina on heado jahaon na Riwayat hidup ni oppu Jamordong natua-tuana alana mati dagingna sambola dakkodo sude mate , tikting sian gareja paboahon na monding oppu jamordong dang kodo hape pandita nga siap ma makke dasi nabottar asa songon na tigor ninna, parakkal -akkal dope na mambahen saritaon.
[Balas...]