Panghataion di ULAON UNJUD

Dimulana I, songon rumang ni ulaon pamasu-masuon, roma parboru diundurhon ma boruna tu huta ni paranak, laos masuk ma tubagas ni paranak, jala disi ma dijamu paranak nasida songon sarapan asa hobas lao tu gareja (istilah manaru boru).

Dung sippul mangan, martangiang ma nasida lao borhat tu gareja. Dung sidung pamasumasuon, di uduti ma tu ulaon adat. Masi pasangapan hula-hula nabe ma paranak dohot parboru, lao patudu hundulan nasida dung jolo masi tomu hula-hula na be. Molo mardongan gondang/music, sambil manottor ma nasida manyambut Dung lengkap pengantin, keluarga, para undangan dohot hula-hula kedua belah pihak lengkap dibogasan bagas, dimulaima acara na ni uluhon ni protokol.

Bolo di Jakarta, marmassam do aturan masuk tu bogasan gedung, alani uppasa namandok; “aek godang tu aek laut, dos ni roha sibaen na saut”

Di sada sisi pakhorhon ni uppasa on, boi bage mura ulaon, di sisi lain, bage maol parsiajaran. Ndang botoon ni naposo dia do sasintong na aturan main na.

Usul sian Panurat, mamereng pangulahonon ni natua tua na parjolo, di ulaon Taruhon Jual, asa parboruma mangundurhon pengantin tu bagasan gedung, jala disima diboan parboru siboanonna. Jala paranak ma sebagai par alaman manomu-nomu parboru na mangundurhon pengantin, di tonga ni alamanna.

Laos hundul be ma di hundulanna Bolo ulaon Alap Jual Ndang pola manomu-nomu haroro parboru siala di alaman ni par boru do ulaon. Jadi parboru dohot paranak langsung mangundurhon pengantin, laos disi ma di boan siboanonna jala boru ni paranak ma manjalo siboanon nasida I. Dung sidung marsijalangan, hundul be ma di hundulanna. (usul do on. Sotung masigedapan hita Alana porludo pembahasan khusus tu son)

Dung lengkap panjouon di horong ni hula-hula paranak dohot parboru, diuduti ma muse ulaon I tu na pasahat hon tudu-tudu ni sipanganon. Dipasahat paranak ma parjolo tu par boru songon on mahatana Pasahathon Tudu-tudu ni Sipanganon Paranak

Protokol Par Anak “Di ari na uli, di ari na denggan on, rodo hami pamoruan mu tu jolomu, pasahathon tudu-tudu ni sipanganon na tabo. Molo tung songoni pe naboi pasahaton nami, on dope rajanami nadapot gogo dohot tangan nami. Tangiangkon hamu hami parboruon muna on asa tusi hami mangalakka sai disima dapot pangomoan, asa boi sogot, umbalga pasahaton nami nalao palashon rohamuna. Songoni pe naboi hupasahat hami tuhamu, las ma rohamu manjalo.Botima!”

Protokol Par boru  ”Suang songoni ma nang hami. Dos do nakkok na dos tuat na. Nunga hujalo hami tudu-tudu ni sipanganon na tabo sian hamu, hami pe antong pasahaton nami ma tu hamu dekke simudur-udur. Asa mangundurhon nauli, mangundurhon na denggan ulaonta dibagasan sadarion. Botima! “

Laos mar sijalangan (Doa makan dibawakan oleh paranak.)

Setelah selesai makan, Pihak parboru menanyakan tudu-tudu ni sipanganon. Songon on ma hatana Pambagian parjambaron

Protokol Par boru “Sai jolo niseat raut do ninna asa niseat hata. Nunga dipasahat hamu tudu-tudu ni sipanganon tu hami, na manukkun mahami nuaeng tu hamu amang boru nami. Tarsongon dia ma baenonta on? “

Protokol Par anak “Mauliatema rajanami. Ia naung hupasahat hami tu rajai, laos rajai ma na mangaturhon. Diama napatut sijaloon nami songon jambar taripar, las ma roha nami disi”

Protokol Par boru “Antong molo songoni amang boru dos ma rohanta. Tarsongon on ma ta baen: Satonga Parsanggulan, Satonga Somba-somba, satonga soit. Ima songon jambar taripar tu hamu amang boru! “

(Di dalam pembagian jambar, beberpa luat memberikan Osang secara utuh kepada tulang pengantin perempuan, di beberapa luat, osang dibagi dua, dan diberikan kepada boru dan bere hasuhuton. Demikian pula ihur-ihur. Di beberapa luat, ihur-ihur tinggal pada keluarga yang bolahan amak, sedangkan luat yang lain diserahkan kepada pihak pengantin perempuan sebagai ulak ni tandok). ( Asing adat di toba, asing adat di silindung asing muse do adat humbang taringot tu parjambaran on… red.

Protokol Par anak “Mauliate ma rajanami, las ma roha nami disi”.

(Tetapi sesuai dengan penjelasan di atas, pihak pengantin laki-laki dapat meluruskan tawaran pihak pengantin perempuan sesuai dengan luatnya) Setelah pembagian jambar taripar sudah sah, masing-masing membagi jambar tersebut kepada

1. “Parsanggulan” tu hula-hula (di Toba), di Hubbang, “Osang” Tu tulang ni boru muli
2. “Somba-somba” diberikan kepada horong ni hula-hula
3. “soit” untuk dongan sabutuha, dohot tu dongan sahuta
4. “Parsanggulan” di Hubbang tu boru dohot bere. Di Toba, “Osang” do jambar ni boru dohot bere.

Sampai di sini, pekerjaan protocol sudah selesai.

Selanjutnya disampaikan kepada tua-tua agar mereka yang akan menentukan raja parhata, Songon on ma hatana. ” molo tinallik huling-huling, laos tarida holi-holi”. ” Molo hahana marulaon, angginama nagabe parsinabul”

Protokol Paranak “Pinasahat ma tu hamu natua tua asa hamu namar dos ni roha, ise nagabe (raja panukkun) (raja pangalusi) di ulaonta on”.

*    *    *

Mandaulat Sipanganon Dung simpul mangan, roma sukkun-sukkun sian par boru manang naung boi dimulai mangkatai. Pada umumna sai parboru do manukkun kesiapan ni paranak, naung boi manang naso boi dope mulaan.

Catatan : Biasana sebelum disukkun kesiapan ni paranak, nunga jolo marsipasangapan angka namarhaha anggi manang naise nagabe raja parhata.

Raja Parhata atau Parsinabul ni Parboru, selanjutnya disebut sebagai PAR BORU” Artia bona ni ari, sipaha sada bona ni bulan. Asa takkas hita na mangkatai, pasahat hamuma Pinggan panukkunan”.

Alus ni Paranak Nauli “Raja nami. Mangarade ma hamu, naroma hami pasahathon”.

(laos disuru ma parboruon pasahathon)

Par boru “Amanta raja dohot inanta soripada, takkas songon naung ni idamu na, di jolo nami nunga sahat pinggan panukkunan, pinggan pasu, nahot dihundulan na. Hot ma pasupasu tajalo sian Tuhan ta. Adong muse di bagasanna parbue pir, boras si pir ni tondi. Pir ma pokki, bahul-bahul pansalongan.

Pir ma tondin ta tusi hita mangalangka disi ma hita dapotan pangomoan.
Boras si ribur-ribur, asa torop maribur ma pinompar ta huhut matangkang marjuara.

Di atasna adong napuran tiar napuran si rara uruk, hasoloman ni angka boru ni raja. Napuran tano-tano ma rangging masi ranggongan,

Nang badan padao-dao anggo tondinta, tong-tong ma digonggom Tuhan.

Adong muse dibagasan na, ringgit sitio suara, ringgit na marmata na tinongos ni pamarentanta, si palas roha ni amanta raja, si toppion ni Inanta soripada. Las ma rohanta saluhutna, mamungka sadari on dinamangula ulaon ta hita, ditumpak asi dohot holong na sian Tuhanta.

(na jolo dohot do tango tango dibaen di atas ni pinggan panukkunan I, laos songonon ma hatana: adong muse diatas na tango-tanggo na marsaudara, mamukka sadari on lam tango ma partuturanta tu joloan ni arion)

Nunga bosur hita mangan indahan na las, jala sagat marlompan juhut na tabo, Sir-sir dohot sirana, domu muse dohot asom na. Di bibir do dai na di tolonan do tabona. Jala sombu minum aek sitio-tio na tinahuan muna.

Sai pamurnas mai tu daging saudara tu bohi. Si pasindak panaili, si paneang holi loja.
Bagot na marhalto ma na niagatan di robean.Horas ma hami na manganthon, sai ditambai
Tuhanta ma parsaulian dohot pasu-pasu na, dihamu na mangalehon.

Diama lakkat na dia ma unok na.
Dia ma hatana.
Dia ma nidok ni sipanganon masak naung hujalo hami,

Takkas ma alusi hamu. Paima so hu pasahat hami pinggan pangalusi, hubuat hami majolo tolu ringgit na marmata on, jala tinggal ma sada isi ni pinggan pangalusi. Asa sada hamu, si sada alus di namangalusi sukkun-sukkun nami. Hupasahat hami ma tu hamu.”

Alus ni paranak “Nunga hu jalo hami Pinggan pangalusi, asa si sada alus hita saluhutna, di sukkun-sukkun ni raja i.

Baris-baris ni gaja, di rura paraloan.

Molo manukkun raja, denggan mai oloan.

Molo ni oloan, dapot ma pangomoan.

Di naung manukkun rajai di sipanganon masak naung hupasahat hami. Raja nami !

Ritip jala hoppa, hotang pangarahutna.

Tung songoni pe na tupa, godang ma pinasuna.

Marbau tanduk, marbau holi-holi.

Godang sibutong-butong, otik sipirni tondi

Sai pamurnas ma tu daging, saudara tu bohi.

Sipasindak panaili, sipaneang holi-holi

Imatutu Rajanami songon nidok ni situa-tua,

Bagot na marhalto ma naniagatan di robean,

Horas ma rajai na manganhon,

sai sai ditambai Tuhan ma las ni roha dihami na mangalehon.

Anggo nidok ni sipanganon masak na hupasahat hami tu hamu, ndada sipanaganon dia I, Sipanganon panggabean parhorason do. Botima !

2. Marhata sinamot (Asa ummura ingoton, mulai sian alus ni parboru, nunga masuk tu na marhata sinamot)

Alus ni parboru “Mauliate ma amang boru! Sipanganon panggabean parhorason do hape sipanganon masak na pinasahat mu tu hami. Alai sai marakkup do nauli, sai mardongan do nadenggan. Siakkup songon nahundul, sidongan songon na mardalan.

Ranting ni bulu duri, jait marjaihotan.

Siakkup ni nauli, dia ma sitaringotan?

Takkas ma paboa hamu.

Alus ni paranak “Nauli raja nami!

Asa takkas ma uju purba, takkas uju angkola

Asa takkas hita maduma, takkasan ma hita mamora

Si takkas ni nauli, takkas mai pinaboa. Raja nami! Ia balga anak, pangolihononhon Ia magodang boru, pahutaon. Takkas songon naung binoto ni rajai, mamukka sian nasogot di buha niari, dibuha ni na uli, di na ta undurhon boru ni huria i tu bagas joro ni Tuhanta, ima boru ni rajai, dohot anak nami. Laho manjalo pasusu pardongan saripeon sian Tuhanta marhite-hite naposo na. Jala naung gabe sada keluarga na imbaru nasida di tonga-tonganta, ima anak nami nagabe helamu dohot boru mu na gabe parumaen nami.

Oppu raja di jolo, martukkot siala gundi

Adat pinukka ni oppunta na pajolo ihuthonon ni hita parpudi.

Alani I songon naung masa taulahon, Raja nami, laos dison ma pasahaton nami tu hamu sinamot na gok, songon somba niadat nami tu hamu. Botima !”

Alus ni Parboru “Mauliatema amang boru, na pasangaphon hami do hamu hape di sipanganon masak nahu jalo hami sian hamu, di somba ni uhum dohot somba ni adat, siala naung gabe parumaen mu ima boru nami jala anak mu na gabe hela nami.

Songon pando ni situa-tua ma dohonon nami tuhamu;

Pitu lili nami, pa ualuhon jugia nami.

Nauli antong nipinami, gohan muma hajut nami.

Ndada talu mangido hami amang boru binsan naung ditaringoti hamu naeng pasahat somba ni adat ni boru nami hamu tu hami.

Barita ni lappedang, mardakka bulung bira.

Barita ni hamoraon mu, sir-sir sahat tu dia Aha pe nahu pangido hami, Ndada pola sadia, bolo binereng sinadongan mu, Piga bara ma lombu, horbo, dohot dorbia nasing, Piga ma hoda asa pintor adong dalan ni angka amanta raja lao mulak, Piga rante mas asa pintor dipangke angka inanta soripada. sadia godang ringgit na marmata, perak, dohot angka na asing, songon somba ni uhum dohot somba ni adat mu tu hami, takkas ma paboa hamu. Songon I ma pangidoan nami. Botima!”

Alus ni paranak “Toho do angka nani dok ni rajai lobi sian i dope nian pasahaton nami tu hamu. Jala napantas do pangidoan munai, pasahaton nami tu hamu. Didok situa-tua;

Songon na mandanggur tu julu do,

namangalehon tu hula-hula.

Habang asisoit songgop tu toru bara,

unang dok hamu hami na holit, silehonon nami do soada.

Ndang tutukan batu da raja nami, dakdahan simbora.

Ndang tuturan datu ajaran na marroha Anak ni raja do hamu,

Pinompar ni na marroha.

Ndada gulut di arta, ndang gulut di ringgit sitio soara.

Alai gulut do hamu di holong ni roha.

Partataring naso hea mintop, partamue naso ra suda Na elek marboru, nasomba marhula-hula. Raja nami, haburjuon munai do na hupangasanon hami, umbahen na barani hami manariashon sidohonon nami. Raja nami, tapasada ma sude pangidoan ni rajai dibagasan ringgit na marmata, natinongos ni pamarentanta, ima hodana, ima lombuna, ima dohot mas, perak dohot angka na asing, jala sisahali mangelek ma hami tu hamu dibogasan sinamot na gok. Botima !”

Alus ni parboru “Nauli ma amang boru! Alai andorang so hu oloppon hami pangidoan munai, lean hamu satongkin tingki tu hami.”

Alus ni paranak “Na uli raja nami! parboru Dihita saluhutna, naung ta paihut-ihut pangkataion, di hita na mardongan tubu, boru dohot bere, tar lumobi ma di hamu horong ni hula-hula nami di na mangido parboruon nami rajani ………………(marga ni paranak) asa si sahali manelekhon nasida disomba ni uhum dohot somba ni adat, asa ta alusi pangidoan nasida i. Hupasahat hami majolo Tu Raja ni boru nami! “

Alus ni boru ni paranak “Sitolopi nauli nadenggan ma hami di dos ni roha ni rajai. Botima sian hami boru. “

Alus ni Paranak “Pinasahat ma tu haha anggi!”

Alus ni hahanggi ni paranak “Hajutmu do hajut hu, tandokmu do tandok hu Alusmu do alus hu, pandokmu do pandok hu. Alusi damang ma si sada hata mahita!

Paranak “Dihamu horong ni hula-hula nami,(digoari ma margana mulai sian hula-hula bona ni ari sahat tu hula-hula anak manjae)dijolo hamu siaduon, dipudi hamu sipaimaon, ditonga-tonga hamu nagabe raja paniroi. Ditong-tonga nami ma hamu nuaenga rajanami asa tiroi hamu hami andorang so huolophon hami dope na sisahali mangelekhon nasida sinamot ni ibeberemuna hupasahat hami ma tu hamu horong ni hula-hula nami!”

Alus ni horong ni hula-hula “Nunga hu bege hami hamu na masialusan, Tung mansai uli do dos ni roha muna, Sidohonon nami tu hamu;

Balintang ma pagabe tumundalhon sidoan,

Ari mu do gabe molo olo hamu masi paolo-oloan Botima!”

Parboru “Lata pe nalata, duhut-duhut do sibut-buton,

Hata pe dipahata angka amanta raja,

Alus ni hasuhuton pe tong do begeon. Pinasahat ma tu suhut bolon!

Alusi ni hasuhuton Nunga hupasahat hami ulaon on tum hamu haha doli/anggi doli, laos hamu ma na mamutushon. Botima!”

Hasuhuton bolon” Nungan dibege hamu amang boru! Alus sian hami mulai raja ni boru nami, pariban mu, sahat tu hula-hula nami, sian I botoon mu do naburju dohami marboru. Asa takkas ma uju purba, takkas ma uju angkola.

Takkas ma buhul muna, takkas ma di bilanganna.

Sipasahaton muna, tu hula-hula muna.

Asa takkas hamu maduma,

takkasan ma hamu mamora.

Anggo pangidoan munai hu olophon hami mai!

Botima.

Alus ni paranak “Mauliate ma rajanami malambok pusu. Nunga pos roha nami manariashon sidohonon nami. Alai andorang so hudok hami bilang-bilanganna, asa lean hamu tikki satongkin tuhami. “

Alus ni parboru “Nauli amang boru! “

Alus ni paranak “Dihita saluhutna, na mardongan tubu, boru dohot bere, tar lumobi ma di hamu horong ni hula-hula nami di nanaung dioloi hula-hulanta rajai………………(marga ni parboru) pangidoanta sisahali mangelekkon hita di somba ni uhum dohot somba ni adat, atik adong dope tamba ni naung tahatai di sibahenonnta tu raja i.

Hupasahat hami majolo Tu Raja ni boru nami!

Alus ni parboruan ni paranak “Sitolopi nauli nadenggan ma hami di dos ni roha ni rajai. Botima sian hami boru.”

Pinasahat ma tu haha anggi!

Alus ni hahanggi “Hajutmu do hajut hu,tandokmu do tandokhu Alusmu do alushu, pandokmu do pandok hu. Alusi damang ma si sada hata mahita! “

Paranak”Dihamu horong ni hula-hula nami,(digoari ma margana mulai sian hula-hula bona ni ari sahat tu hula-hula anak manjae) dijolo hamu siaduon, dipudi hamu sipaimaon, ditonga-tonga hamu nagabe raja paniroi. Ditong-tonga nami ma hamu nuaeng rajanami asa tiroi hamu hami andorang so huhatahon hami dope bilangbilang ni sinamot ni beremu nanaeng pasahaton nami tu dongan saparhundul mu hupasahat ma tu hamu horong ni hula-hula nami!”

Alus ni hula-hula ni paranak “Nunga hubege hami hamu namasi alusan, Tung mansai uli do dos ni roha muna, Sidohonon nami tu hamu; Balintang pagabe tumundalhon sidoan, Ari mu do gabe molo olo hamu masi paolo-oloan Botima!”

Parhata Paranak” Lata pe nalata, duhut-duhut do sibut-buton, Hata pe dipahata angka amanta raja, Alus ni hasuhuton pe tong do begeon. Pinasahat ma tu suhut bolon!”

Alus ni hasuhuton “Nunga hupasahat hami ulaon on tu hamu haha doli/anggi doli, laos hamu ma na mamutushon. Botima!”

Paranak”Nungan dibege hamu raja nami! Alus sian mulai raja ni boru nami, sahat tu hula-hula nami dongan sahundulan mu. Tung hansit do tangan mandanggurhon na soada. Nunga sude namboru muna on paruarhon simpanan na asa anggit tung umbalga pasahaton nami tu hamu, inama gokna. Sitakkas ni bilangbilanganna siapasahaton nami tu hamu godang na Rp 150 jt (Sitombol, diluar ni panandaion dohot todoan) disima mas na, disi hodana, disi nang dorbianan, las ma rohamu manjalo. Boti ma!”

Alus ni parboru “Mauliate ma amang boru! Di bilang bilang ni sinamot nagok sipasahaton mu, songon somba ni uhum, somba ni adat mu tu hami. Dihita saluhutna raja ni boru, raja ni dongan tubu, ale-ale, raja ni dongan sahuta, lumobi di hamu horong ni hula-hula nami, takkas songon naung tabege sinamot nagok sijalooan ta sian borunta, godang na Rp 150 jt. Dos ma rohan ta tahalashon mai. Antong di hamu par boruon nami nunga rade hami lao manjalo pasahat hamu ma”

Alus ni paranak “Mauliate ma raja nami, mangarade ma hamu roma hami pasahathon sinamot nagok”

Udurma paranak mamboan sinamot (hepeng) di atas ni piring namarisi boras. Parjolo ma dipasahat tu raja, baru pe asa tu hasuhuton. Ihut tusi laos mardalan ma panandaion tu suhi ni ampang na opat dohot tu angka na asing. Naporlu di suhut par boru dohot paranak, ima di tingki pasahat upa tulang dohot tiktin marakkup.

Pasahathon Upa Tulang. Par boru manogihon paranak tu tulang ni namuli. Lao pasahathon upa tulang, songo on ma hatana.

“Raja nami nunga hupasahat hami sinamot na gok tu rajai par boruon muna songon sinamot ni ibebere ni rajai godang otikna sian sinamot I hupasahat hami tu hamu lasma rohamu manjalo, jala tangiangkon hamu ma ibeberemu ima anak nami dohot parumaen nami. Asa gabe rumatangga na denggan, sitiruon jala nagok las niroha di pasu-pasu Tuhanta”.

Pasahathon tikting marakkup Par anak manogihon par boru tu tulang ni pangoli, lao pasahathon tikting marakkup. Songon on ma hatana. “Hot pe jabu I, hot margulang-gulang. Tudia pe berei mangalap boru hot doi boru ni tulang. Onpe di hamu dongan saparhundulan nami maradophon pamoruonta marga . . . . . (margani paranak) nunga sisada boru hita maradophon nasida. Tanda naung sisada boru hita maradophon marga …….. otik godang na sinamot ni borunta naung hujalo hami. saotik sian I hupasahat hami tu hamu. Asa molo ro nasida tubagasta gabe boru . . . .(margani tulangni pangoli) borungki di jolo muna asa sida ajar hita dohot sisada poda tu kelurga na baru on, botima.”

(Naeng ma nian hasuhuton langsung manghatahon on.)

Catatan: Ditikki napasahat upa tulang, laos disima dipasahat hasuhuton piso-piso/situak natonggi tu horong ni hula-hula sasudena. Ditikki pasahathon tikting pakkup, laos disima dipasahat hasuhuton piso-piso/situak natonggi tu horong ni hula-hulana. Dung sidung dipasahat sude jambar hepeng dohot panandaion, dipasahat ma pangkataion tu paranak

Hata ni Paranak “Mauliate ma raja nami! Di naung simpul hupasahat hami tu hamu sinamot nagok dohot angka panandaion pos situtu roha nami di pangidoan nami. Dos nakkon dohot tuat na, asa tangiangkon hamu ma hami rodi sude uduran nami marhite ulos herbang songo nima pangidoan nami raja nami!”

Alus ni parboru “Pos rohamu amang boru! Sude do hamu ulosan nami.

Aek natio do hami na riong-riong di pinggan pasu,

Hula-hula naburju do hami na gir-gir mamasu-masu.

Alai molo so sude pe hamu dapot ulos herbang, Anggo ulos tinonun sadari pasahaton nami do tu hamu. Mangarade ma hamu asa ro hami pasahathon. (adong do naikkon di hatahon bilang-bilangan ni ulos, alai adong do saling porsea tu naung dihatai di tikki na marhusip)”.

Dung sidung di pasahat ulos tu suhi ni appang na opat, dohot ulos parjambaran, mardalan ma ulos holong tu pengantin.

a. namar haha anggi sian suhut par boru dohot boruna.

b. Dongan sabutuha ni par boru dohot boruna.

c. Dongan sahuta dohot ale-ale

d. Horong ni hula-hula ni par boru

e. Horong ni hula-hula ni paranak

Asa pasingkathon partikkian, nunga di pamasa halak di tikki na mangulosi, laos disi ma didok angka hata sigabe-gabe, lumobi horong ni hula-hula. Masing-masing ma hasuhuton mandok mauliate tu horong ni hula-hula na be.

Tar songon on ma hatana.

Turtu ninna anduhur tio maninna lote,

hata pasu hata gabe napinasahat nu tu hami,

unang muba unang mose.

Naung sapulu pitu majumadi sappulu ualu

hata muna rajanami aka nauli, akka pasu-pasu, pasauthon ma amanta Debata,

appe mai di parsalimbubuan name tuak mai di abara name,

apuon name ma di tonga ni jabu.

Aek marjullak-jullak, jullak-jullak nai baenon tu pinggan pasu.

Hata na uli, hata na denggan na pinasahat mu tu hami

Amanta Debata ma na masu-masu.

Molo tung mulakpe hamu tabagas mu marsada-sada sai Tuhanta ma namandongani hamu di pardalanan,

hipas sahat tu tonga ni jabu.

Hata parpudi sidohonon nami tu hamu,

malos bunga-bunga di padadang-dadang ari,

selamat jalan ma di hamu horong ni hula-hula nami,

selamat tinggal ma di hami, manurushon ulaon sadari.

Na porlu si pahaman, di ujung ni ulaon, I ma ditingki mangolophon sude naung di ulahon (mambagi olop-olop). Asa unang ma dohot angka dakdanak na manjalo. Olop-olop, I ma sada tanda pertanggung jawaban sian sude na manjalo. Molo tung adong persoalan sogot di ripe na imbaru i, ikkon na manjalo I ma na gabe saksi dohot na paturehon persoalan ni ripe na imbaru I, songon tanggung jawab dibagasan hukum perakawinan adat batak.

Partording ni Acara Terakhir Ulaon Sadari Dung simpul sude ulaon I, turun ma sude hasuhuton sian panggung jala diboan parboru ma pengantin jolo raphon nasida. Diudurhon parboru ma pengantin tu paranak, laos diboan ma Indahan, Ikan mas, dohot lappet. Sebelum na nunga ditaruhon hian, sipanganon lengkap dohot na margoarna tu inganan ni parboru.

Dung sahat pengantin tu inganan ni paranak, lao mulak par boru/panaru tu ingnanna, lehonon ni paranak ma situak na tonggi di raja naro dohot tu panaru. Masa do di son adat na ni adat hon, i ma: Lao bubar, ndang pittor masijalangan, alai jolo marende sa ayat, martangiang, baru marsijalangan. Bage menyatu namai di adat lao bubar siala haporseaon na ta anut

Oleh Beresman Rambe  ( Penulis adalah Raja Parhata dari Marga Rambe bertempat tinggal di Jakarta)

Tulisan yang sama:

• PEMAHAMAN TATA ATURAN ADAT KEMATIAN
• PEMAHAMAN KONSEP BORU NI RAJA BAGI ORANG BATAK
• PEMAHAMAN ADAT BATAK
• Kazhanah Bahasa Batak Asli – 2
• Pergeseran Adat Batak Toba