Pancasila ni Parpakkat
ide cerita : amaniharapanlumbangaol
Molo didok guru najolo, ima jolma na malo, na pistar marroha jala sitiruon do sude angka pangalahona. Sahalak guru ikkon malo do ngajarhon angka parbinotoanna tu saluhut sude naniajaranna, manang aha didok ibana ido ihuttonon ni angka siseanna, jala tung mansai na hormat do tahe karejo ni sasahalak molo nunga didok ibana guru. Ido antong anggo najolo.
Ia si Pantun, andorang so di tontuhon pamarenta didia imana mangajar, mulak ma ibana tu hutana. Tung mansai las do rohana tahe ala tamba ma sangap ni natua-tua na ala naung saut ibana gabe guru. Ai sijujung baringin ni natua tuana ma ibana jala gabe jolma na hasea. Jala natua-tuana ipe antong dang marna sae jala dang marna bosan paboaboahon tu donganna hombar bagas, tu donganna sahombar balok di hauma. Ditikki i, didok among na ma tu ibana ” Ua ajari majo hami majaha dohot manurat dah, tangkas do diboto ho angka na buta hornop do hami sude”. Ninna among na tu si Pantun. Anak sipangoloi do ibana di hata ni amongna i, jala dioloi ibana ma asa olo ibana mangajari amongna dohot angka dongan na.
Marpungu ma angka natua-tua i, jala tung mansi las do rohani nasida, ala ajarion ni si pantun ma nasida dohot manurat. Nang si pantun pe tahe tung mansai las do rohana, isarana patuduhonon ni rohana ma tu nasida naung gabe guru ibana.
Sadari, dua ari, tolu ari, nunga marminggu-minggu naung marsiajar i nasida, jala nunga be diboto hasida saotik-saotik, mangaleteri ma istilahna. “Sa tambah pu,…sapu” ninna oppu NIngon huhut sai dipahulahulakkon. Dungi didok oppu tarapul muse sian suhi-suhi na asing, ” a..emmmm..ooo..nnngggg…among,….eah,.maol na i” ninna huhut songon na marungut-ungut ibana alai sipata mekkel suping alani las nirohana nunga diboto be nang pe sai sasaotik.
Si Pantun pe antong namangajari angka natua-tua i las rohana, boi do hape niajaran nang pe maol. Alai ima sipata, molo di huta i dang sude dope mamboto hata indonesia, jala molo tung pe diboto manjahahon hata indonesia i dang diantusi nasida hata najihana nasida i.
“Ai attar naummaon nai ma jo taguruhon anaha, nunga godang binoto” ninna amani poltak sahalak naumposo sian namarguru i.
“Sai na pabilak-bilakkon do ho, so binoto dope manjaha nga tor namaol i” ninna oppu tarapul huhut sai mangubit-ubit simangkudapna mangapil akka leter na maol i.
“Ai aha do lapatan ni hata an anaha, patorang majo tu hami….sai gantung disi, hape sobinot, gambar ni pidong, aai marhorung-horung” ninna amani Torang ala inganan parguruan i gantung do gombar ni Garuda Pancasila, dohot angka sila – sila si lima-lima i.
“O…..ima goarna Garuda Pancasila, jala on ma songon partanda ni negaranta”
” Olo madah,..ahai pancasila i, so niantusan ” ninna amani Tonggo sian suhi-suhi i dohot songon na busisaon.
Dipatorang si Pantun ma antong, Pancasila ima silima-lima on ma ojahan ni negaranta, ninna sipantun alai tung mansai maol do manorangkon.
“Patorang ma jo anaha alai bahasa batak i ma baen, so niantusan bahasa indonesia..” ninna amani pantun amanai.
Alai tung mansai loja do ibana jala molo dipatorang hata dohot hata tung mansai ambal do lapatnna, jadi dok ibana ma.
Parjolo, Ketuhanan yang maha esa lapatanna, dang adong jala dang boi pajago-jagohon dijolo ni Debata, sada do debata. Jala tutu songon na minar ma bohi ni siseanna i mambege panorangion ni si Pantun.
Paduahon, Kemanusiaan yang adil dan beradab. Onma nanidokna Masihaholongan angka jolma, somba marhula-hula, manat mardongan tubu, elek marboru, jala denggan mardongan sahuta jadi dalihan na tolu na ma on paopathon sihal sihal……ninna si pantun muse.
“Ido ateh,..sarupa do hape” ninna amani holong huhut unduk-unduk.
Patoluhon, Persatuan Indonesia, lapatanna Parsahutaon ni Halak Indonesia, boi dohonon Sarikkat Tolong menolong ma on manang EsteEm, punguan parsahutaon.
Paopathon, kerakyatan yang dipimpin oleh hikmat kebijaksanaan dan keadilan, lapatanna, marbadai, marbadai dungi mardame muse, songon hata ni umpasa siboru puas siboru bakkara, molo nuga puas sai ma soada mara, alus na lambok paombun rimas jala unang marsipailaan.
Palimahon ima keadilan sosial bagi seluruh rakyat indonesia, namarlapatan ma on massi haholongan, marsurupan disude namasa, marsidadapari diulaon, marjulo-julo jala mararisan dipunguan.
“Olo…nauli ma i..” ninna nasida rappak mandok
Denggan ma tahe panorangion ni si pantun ateh…..>!
Berita lain ...
Komentar via ID Facebook Anda, silahkan Login...:
2 Responses to Pancasila ni Parpakkat
Leave a Reply
Itennngg,.. jo hamuna.
Tikki mula-mula disuruh guru (Pelajaran Kewarganegaraan) iba mangapil Pancasila, memang ittor semangat do iba pajojorhonsa.
Alai molo pas mandok sila paopathon i, (pas di kalimat “PERMUSYAWARATAN” i, ittor songon na gugup jala marsamburetan do iba, sipata olo salah iba, nidok “PermusyaRAWATAN” .
Je adongma sada dongan (ditikki SMP), topek ma pelajaran Kewarganegaraan i, disuru guru ima ibana tu jolo laho “pajojorhon Pancasila”, huhut disukkun “sian dia do mula ni Pancasila” .
Dung sahat dijolo, ittor gugup ma ibana. Ndang boi dipajojor ibana. Bukku sijahaonna pe, ndang dope adong dituhor amongna, je ndang dope hea diapil ibana.
Mamereng situasi i, ro ma dongan na sahundulan dihirapma ibana sian hundulannai, didokma songon na dihusiphan tu ibana, ” He, Kaltu !, ingot guru Kewarganegaraanta di Kalas 1, ima Guru Silaban ” inna ibana nanget tu dongan nai.
Umbege i, ittor didok ibana ma gogo :
” Panca sila ” :
1. SILABAN
2. SILALAHI
3. SILAEN
4. SILANGIT
5. SILALI
dirippu ibana maksud ni dongannai asa diingot akka marga batak na marmula SILA.
(alai SATTABI tu sude akka na marmarga i da)
“Je mula ni Pancasila sian Batak do “inna ibana dengan gaya yang menyakinkan.
Umbege i, guru i pe, bage tarserom do.
Tutu do ra sian Batak mula ni i, inna rohana tong, alana dibuku pe tutu, ndang dope hea dijaha manang sian dia “mula ni Pancasila”, alai na disurathon di buku i “akka pencetusna” do (dengan beberapa versi).
Malo do tong si Kaltu i ateh ?
Horas Jala Gabe, Tetap Semangat dan GBU, Amen.
[Balas...]
Adong dope naunlussu, ujui di pakkat do on,
dung di lantik pappung na baru, manang kepala desa didok amanta samat ma,
“kappung ni desa adui ma jo mambaen pancasila”
hape tikki dang adong teks na, jala kampung na didokna on pe, ai bohama dihitaaan, ndang sude akka sijama surat na gabe kappung,..kale-kale..
je didok ibanama
Pancasila, satu…Ketuhanan yang mahaesa..
Kedua dan seterusnya sampai lima, masih seperti dulu, tidak ada perubahan!
[Balas...]