Masihaehaean….

www.latteung.wordpress.com

hendry lbn gaol

Tung massai namaol do manjaha hata batak on, attar sarupa ma maolna tu bahasa inggris. Molo sala manjaha olo gabe diparekkeli namambegesa. Alai adong asingna otik. Molo hata inggris, ia tung sala jinaha, holan pandohan i do na gabe geok. Alai molo hata batak, olo do sala jinaha gabe asing lapatanna ujungna gabe siparekkelan. Dang holan i, mandokkon hata batak on pe marasing do di ligato manang dialeg. Ai godang do hata batak na sarupa manurathon alai lapatanna dua. Ikkon ni ihuthon ma pakkataion i asa binoto dia lapatanna.  Ido alana, dipustaha na husurathon, sarupa do manjaha sarupa manurat, asa hattus jala mura diattusi dongan pajjaha.

Isarana, SIMBUR, boi do i marlapatan hatop magodang, alai boi do i marlapatan udan na met-met. Molo didok “nga ro simbur” lapatanna ” nga ro udan na met-met”. Alai didok deba muse “simbur magodang ma ho” lapatanna hatop ma ho magodang. Jala godang dope hata na asing nasongoni.

Hamaolon na asing muse, olo do balik sa leter, tor asing muse do lapatanni on. Ido asa unang sai pabilak-bilakkon iba pabalik-balikkon na bilak, olo gabe balik. Ima naduhok nakkin. Holan inganan ni leter i dohot a do na martukkar. Asing do na balik, asing muse do na bilak. Jala, molo asing intonasi / ligato/ aksen mandokkon hata bilak on, adong muse do dua lapatanna. Dang pola hupatorang jo anggo on.

Disada pargurendean koor ama, ai somal do songoni, molo dung sidung na margurende on, dibaen do kopi na las, asa songon na paulak hosa loja, ai namerende on pe loja do, habis hosa. Tarlumobi ma molo maol ende on, tor golap do pakkilalaan. Jadi minum kopi ma jo satokkin, ia na marisap-ma akka dongan namarisap, marnonang dongan na marnonang. Masisesean manukkun barita, jala molo tung adong sihataan disima dihatai nasida punguan i.

Dukkon i, dung sidung na marisap i, di pukka amanta sintua ma mambukka bibelna, ima sittua naung pinarade ni huria laho mar-PHD, Pasahathon Hata ni Debata, tu sude punguan koor ama. Molo hata sisaonari Penelaahan Alkitab ninna, jala attar songoni do somalna.

Di borngin i, ia na mangalean PHD ima amanta st.Jamodong ma. Jala nunga rupani binereng haradeon nasida laho mar PHD on,  adongdu bukkuna, dungi impola ni jamita jala hatop mardalan doppak langgatan i. Dipukka ma ulaon partangiangan on marhite na marende sian bukku ende. Na hicca -hicca i do dipillit sittua i, jala dipillit do na mura endehonon hon, ai mardomu molo na margurende do, dang haru adong na mamboan buku ende manang bibelna be.

“Turpuk dihita borngin on, ima sian surat ni Apostel Paulus tu huria Epesus, ima di biddu 4 ayat 1 ro di 4″ ninna dungi dijaha amanta sittua on ma rupani ayat na nidok na i.

Dang na mandok songon dia iba, alai ima huroa, songon na hudok di gijjang, tung massai namaol do manjaha bahasa batak on. Nang pe rupani nunga sittua, alai sai olo go gabe asing manjaha asong muse mandok.

Didok amanta st. Jamordong ma,” Tuhita saluhut bangso ni Tuhanta, tarlumobi di hita punguan ama. Di Oddolhon do tuhita asa marsihaehaean hita, taida do i di ayat dua nakkinon” sip satokkin.

“MASI HAEHAEAN ma hamu, jadi nanidok na disi ima na massihaehaena on, masitukol-tukkolan ma, jala sian hata haehae do i” ninna sittua on muse. Jala diranapi sada-sada parende ama on.

Nunga gabe geok be na mar PHD on, jala dongan pe nunga serom jala mekkel na tinahan nama, ala didok masihaehaean on. Dang dietongi situa on didok ma muse

“Attar sarupa do dohot haehae, adong do na mulus adong muse do na turik-turikon, adong na bolon adong muse do na marniang. Jala, takkas taboto, anggo so adong haehae, dang boi hita mardalan, dang boi hita jonjong, dang boi hita mangula. Ido lapatanna, asa molo tung marasing pe haehae i, ikkon do marsitukkolan, songon lappak nigaol, jala on ma nanidokna MARSIHAEHAEAN. Jala parngoluon on pe adong do na mulus adong muse do akka parsoalan” ninna.

Sai marsiberengan ma ruasii, mambegesa. Ai nabinoto molo HAEHAE on ima PAHA molo di KFC didok ma on PAHA MENTOK attar arga do on sian bagian na asing.

Ai tohodo adong didok di bukku nabadia i, marsihaehaean?, dang adong nanggo sahalak sian ruas i na patuppolhon, ala mardomu, somal do molo holan margurende do, datung diboan be alkitab manang bibel na.

Jala molo di parjambaran ni halak batak, attar bagian ni BORU do haehae on, ima apala SOIT ninna.

“Hamuna amanami, punguan parende ama ni huriatta, sude panggulmiton ni ngolu ni dagingta on, marojahan manang marpangondolan tu haehae do, mangalakka pe hita tu jolo ikkon sadalan do haehae sihambirang dohot tusiamun, songoni do nang parngoluon on. Hita akka naporsea ikkon marsihaehaen do, asa talut hita tu harajaonna sogot..amen” ninna sittua on ma manutup PHD.

Dung sippul ulaon i, dipatikkos jala disukkun salahak ruas ma hata ni Debata na jinahaon ni sittua Jamordong on, tohodo di surathon songoni?.

“Molo dang porsea hamu, bukka hamu bibel munai, ido asa sai jinahaan bibel i” ninna st.Jamordong mangalusi.

“Diajo bibel mi, asa hubereng jo takkas” ninna amaniSumuang, huhut sai serom alani geok na.
“Bereng ma neh, jugul hian hamu” ninna St.Jamordong muse
“Ayat piga nakkinon”
“Bereng ma di ayat dua i….”

Rappak ma mangalului Epesus 4 ayat 2  i, jala dijaha ma nanget huhut ma mekkel hami salhutna

“Ai bereng jo sittua dah, didia adong disurathon MARSIHAEHAEAN disi…” ninna amaniUrupan. Sahalak na tumua di punguan i.
“MARSIHAEHEAAN do,….geok nai” ninna akka dongan muse.

Sai lam dipamanat ibana ma leter i, gabe mekkel ma sude. Adong mandok, ikkon lerning ma jo muse apala lima taon nai.
Amani Harapan pe gabe mekkel nama sahat rodi jabu…alani Haehae on