Martangiang ma hita…
Dung simpul ulaon partangiangan i, somalna do dibaen namanjabui songon kopi manang tes manis, jala dison ma nasida masisisean manaringoti akka aha naporlu jala aha barita a adong diluat i. Jala dipillit do na gabe parhobas di partangiangan di minggu na naeng ro.
“Imadah, anggo partangiangan lingkungan di minggu na ro ima di lingkungan pitu di jabu amanta amaniTogos ma jo”
“Nauli amangamang pastor” ninna amaniTogos huhut ma ganup nasida masisosoan asa unang lupa laho mandohoti partangiangan balik mingguna i.
Ai marsoring-soring do na manjabui partangiangan I, songodi do dibahen nasida asa ganup jabu ni akka ruas I dapotan. Tutuma nian sian minggu tu minggu lam tu ringgasna do nasida laho patubegehon hata ni Debata napinatolhas marhite naposona, sahalak pastor naposo na, ipe dope di tabalhon di paroki na met-met i. Marnamalo do tahe anggo pastor on mambuat rohani ruas I, burju muse jala dang marnaloja patolhashon akka jamita i, akka hata ni Debata.
Nang songoni tu akka ama naposo, ditopot pastor I do tu parpungu-punguan ni akka ama, dilapo, dialaman, dikode tuak, didia pe taho. Ai dang tor marjamita di ula, alai marhite na mangalean panorangion di parngoluon siganup ari, akka parsorion di ngolu siapari, sahat rodi boha manuan eme dohot denggan. Dimula na I, hurang do panga-uon ni akka natorop i. Ai molo dung ro pastor I rupani tu lapo tuak I, tor sip be do nasida, hohom, tarlumobi diakka ruas naung tinanda ni pastor I, songon amaniTogos nang siJamordong tor lao do manginsugut tu pudi-pudi i.
Nanget jala sai diajar-ajari pastor on ma nasida marhita parsaoran siganup ari. Ai olo do sipata diarahon manang na dijou akka dongan ama I rappak mangopi tu jabuni pastor I, hape sada maksud dohot tujuan, asa unang lalap do na markoa nang mar dobol disi.
Sada hahuranganta ima, molo nunga mandok tangiang, pittor sude do humitir. Olo do dang ro partangiangan asa unang didok mambaen tangiang. Nang di pestape, olo do sai parpudi mangan asa unang ibana sibaen tangiang laho mangan. Nian tutu do, songon na bakkol do baba mandok hata tangiang on, atik na boha i.
“Di partangiangan minggu na ro, hamu ma jo amang Jamordong , mambaen tangiang pangondianon, ai holan hamu nama naso dapot tugas” ninna pastor on.
Dimula na I, dijua ibana do, tung godang do dalan dibaen ibana sidalianna asa unang ibana siaben tangiang. Alai ala gomos dipangido pastor on, gabe di oloi ibana, jala dang lupa ibana mangido tu pastor I asa diajari martangiang na denggan.
Dung dapot tikkina, dapot arini partangiang I, nunga hobas be nasida lao tu jabu ni amaniTogos. Borhat ma nang siJamordong diboan ma bibelna. Alai dua ari andorang so I, nunga sai diapil-apil ibana tangiangna, dipahulahulakkon dijabu. Tung holsoan do NaiAdopan iama parsonduk ni siJamordong mida ibana.
“Ai diboto hodo innon mambaen tangiang pangondianon, sotung pailahon dah!”
“Ai nunga iba did ok pastor I, jala nunga marsiajar au”, ninna mangalusi huhut ma dipasuman na martangiang on dijolo ni niolina i. Denggan do tutu hata-hata ni tangiang i.
Alai, andorang so sahat tu jabu partangiangan I, disolpukkon siJamordong do lao tu lapo ni amaniAgatan mandorgukhon salokki, asa songon na barani mandok tangiang on, ninna ibana alasanna.
“Bah, ai tudia lae songon na ias pahean I” ninna akka doli-doli na marpungu di lapo i. Ai godang do doli-doli disi marendei, paima bot ari huhut minum tuak.
“Olo bah, tu partangiangan do bah, nga songon na leleng nasodohot I, alai hatop dope ari, bah ni inuppon ma jo sagalas gajjang” ninna huhut disobur tuak na on.
Pola do lalap ibana satokkin di lapo I, mambege-gebe akka naposo I marende jala manginum tuak i. Dung dapot tikkina, hehe ma ibana jala borhat tu jabu ni amaniTogos.
Dapot ma tikkina martangiang, dungi didok amanta Pastor on ma sian jolo manjouhon asa dibaen siJamordong tangiang pangondianon.
“Baen hamu ma amang tangiang pangondianon I, molo tung adong dihita na rikkot sitangiakkononhon, boi ma dipasahat tu amanta siJamordong asa diboan annon ditangiang”
“Ima tutu amang pastor, ianakkon nami nabaru tammat sian parkuliahan asa hatop dapot karejo, nang tinodohonna lao UAN nama asa bulus-bulus sude, unang adong akka abat-abat, songoni tinodohonna si Arta nadi SMP ala dibagasan parsahiton do, nang siappudan I pe ujian do kalas onom” ninna amaniTogos huhut hundul muse.
Dungi hehe muse akka na asing mandok akka na adong dirohana be, aha naeng siangiangkonon na.
Andorang so dipasahat hata tangingan, da molo dikatolik sai songon na diligatohon do hata ‘martangiang ma hita” asa badia ualaon i. Dungi dialusi ruas ima muse dohot hata “tangihon ma tangiang nami”. Andorang so partangiangan I, nunga diapil-apil sijamordong boha legato ni hata tangiang i.
Dungi jonjong ma ibana dah, dipadenggan saotik paeheanna, jala diserbeng tuhumaliang tuliat na lolo tu akka ruas na mandohoti partangiangan I, ai pola do torop na ro i. Alai tutu, tamba do habaranion ni ibana ala nunga marsampur tu kambing-putih nakkinon dua dorguk.
Dimulai ma “Martangiang ma hita” ninna ibana.
Tor mallakak-lakak ma jolma I mekkel mambegesa. Bolak bohina, jala maila situtu ibana. Aha so mekkel jolma i. Ai lagu ni ende SIGULEGULEPPONG do dibaen ibana, ima apala pas lagu ni sada ma dua tolu….. AI naso dialusi jolma ido. “sigule-guleppong”. Huroa nga mangula rarui, jala di ingot ibana boha legato ni ende I di lapo nakkinon.
Naburju partor I, nang pe tong nunga geok dibagas rohana dipatikkos ibana do boha pandohanna. Dung salpu I, di uduti siJamordong ma muse tangiang I, tong do barani ibana, bohama habaranion ni kambing-putih. Nangpe akka natorop I nunga adong mallikik molo diingot lagu sinakkinon.
Dibilangi ibana ma sada-sada ninna ma” ima tutu, ianakkon ni huriam sian amaniTogos, naung sidung sikkolana, sai homa mangalehon pandaraman, songoni nang tinodohonna na UAN, lehon pikkiran na tio asa boi di alusi akka sukkun-sukkun na jinalo ni ibana, songoni ma si Arta nadibagasan parasiton, pamalum Tuhan. Tuhan nami jala Debata nami, didongan nami naso boi ro dope mandohoti partangiangan on, manang didia pe homa na mangaramoti, Nang par-taonan ni jemaat mu radoti jala padao sian akka pangago…..”
“Osse jo tahe, lupa au, anak ni amaniTogos adong kodo sada nai hape ima siappudan I, ai mardomu UAN nuaeng pasu-pasu ma tong” ninna ibana dang sadar ibana. Dang tartahan jlma I be, nunga godang na mekkel mambegesa, ai didok “osse jo tahe…”
Dang parduli ibana, ditorushon do muse, alai ala nunga godang na mallikiklikik di sugut-sugut an alani Manahan ekkelna dipasidung ibana ma ajal didok ma muse “Eah,..godang kodo hape Tuhan sipangidoon nami, alai nang so hudok hami Tuhan, nunga diboto Ho I, butima, amen…..” ninna ibana, alai andorang so hundul ibana didokkon ibana kodo muse “eaahh,…..matte ho!!!”
Tulisan yang sama:
5 Komentar pada tulisan “Martangiang ma hita…”
Komentar anda pada tulisan ini
ONLINE
Rism Panjaitan :
each..gabe taringit au naujui tiki menet dope iba kls 4 SD kisah nyata, tikki Parmulak ni Ibotonami Jonggi Panjaitan sian Irianjaya & Australia, ito Jonggi on dope tikki i naung borhat mangaratto jala berhasil. dibaen do Parpunguan PArtangiangan jala torodo nadiundang, ditudu ma sibaen tangiang sian sada Ina ima Op Sarli Tobing (Op nisi eden Tobing) martangiang ma hita ninna Aleeee Tuhan Deabata Parasiroha Bolon.. dison hami marpungu mandok Mauliate tu AdopanMu nabadia, naung rodo anakkon nami sian Austaralia (mandok Australia) ima anak nami si..(leleng sip.. diulakkonmuse.. ima ankanami si…..ala lupa ibana gabe disukkun ma nadilambung nai bollang ma muse didok ISEDO TAHE GOAR NI ANAK ON ?? ROMA JOLMAI RAP MANDOK si “Jonggi” diudutima muse tangiangnai ooo ima Si Jonggi Tuhan.. dst. mengkel.. majolmai sude.. gabe suhutan mai sahat tu saonari… ehh tahe akke.alai anggo Opung on dang siinum Tuak kale,, martonun do Malo martonun Ulos. imajotusi..
[Balas...]
Jaullus (raja mullus-ullus) :
Taringot ni namartangiang ma i.
Adong ma sada huria di sada kecamatan jadi amanta camat on sering do jala olo do manjalo partangiangan di bagasna. Sada tikki, margiliran ma tu bagas ni amanta camat on inganan partangiangan. jala kebiasaan dibaen nasida, i namanjabui ima sibaen tangian pangondianan. Bisuk do amanta samat i berengon, ndang pola tarida naso hea mambaen tangian agia di bagas nasida. hape nadisurat amanta samat on hian do tangiangna di sallembar harotas, laaos ima dijahahon dung pippit jolmai. Di tikki i di bagas ni amanta samat on, dung giliran ni ibana mambaen tangiang pangondianon, jongjong ma amanta samat di dok ma:”Tapahohom ma, tapasada marohanta Martangiang mahita” laos dibuat ibana ma harotas i sian sakku nalaos dijahahon. alai tikki holan pambuka nitangiang dope di baen, pintor mate ma lampu. golap ma ndang haidaan, laos so ma amanta samat on ndang makuling be ala so boi be di jaha na tar surat di harotas i. akka ruasi tong do paimahon ujung ni tangiang i, ndang pola gabe guntur ala mate lampu. Alai sai dipaima tangiang on, ndang na olo mar sambung, roma istri ni samaton naeng marhusip do nian mandok alai tung takkas do didok “dokkon nanggo sakkababa nai” nina huhut di tobbis inantai amanta samati, tong laos so marhaujungan.
[Balas...]
Lintong Nababan :
Molo on kisah nyata do bah,
tadok ma goarni amanta i si untung( nama samaran unang muruk anon).
Ia si untung on dang headope memang nibereng martangiang, baik lao mangan manang diulaon naasing, jangankan martangiang tu gareja pe boi dohonon dang hea.
di bulan tolu mangoli ma ibana mangalap boru sian huta naasing. Jala tar somalna di hutani simatuana on bulan opat nga panen eme jolma, sebagai hela baru dijou simatuana ma si untung dohot parnijabunalaho mangurupi simatuana marpanen
dung simpul ulaon nasida sian hauma, mangan ma bodarina rap dohot akka parkarejo naasing, jala didok simatuana ma tu si untung asa ibana mambahen tangiang mangan.
Simatuana: Bahen Hamu tangiang i Amang Nababan!
dang tarjuani si untung on pandohanni simatuanai, alai nga hitir hitirbe ibana, jala sai dipaksahon nanialapnai ma asa dibahen tangiang mangan.
Je songon ma tangiangna
Untung: “Martangiang ma hita:
metmet au on malias rohakkon, sasada ho jesus donganku tottong”
Amen.
Gabe mengkel ma sude..
[Balas...]
Riduan Nainggolan :
Memang busisaon do molo dang biasa martangiang, je adong muse ma songon dibaen :”Baen hamu ma amang tangiang mangan i ninna helana tu simatuana, ba naung rade do sude ninna simatuanai antong, nungnga be amang baen hamu ma, songon na meyakinkan do antong di baen amanta i : “Martangiang ma hita ninna simatuanai antong, hohom ma sude huhut marloppit tangan “Ale Amanami mauliate di-Ho,…(gogo do antong didok simatuanai) ba..sst..ats ..est..its..asssi…..so.sas.sis.sessssai…s(dang tarbege suarai,ai marhusipi do amantai jala dang be jelas aha be didok, ai boha do naeng ninna roha ni helanai, di tulngop ibana ma amantai masibereng ma nasida ai amanta i dang martutup mata mulai sian nangkinon je dihusippon amantai ma tu pinggol nihelanai ..nga boi bei, amen ma ninna nanget huhut unduk-unduk amantai, nungnga be da….huhut batukon amantai, toe ma ai soise Tuhan i pe diboto i, dang pola ala ni ganjang ni tangiang…toe ma bukka be ma matana asa mangan hita ninna amantai, dung dibukka be matana “Maulia te ma di ho Tuhan” ninna amantai muse, ba ai naso sae dope hape martangiang bapa on ninna roha ni boru nai, lipat tangan ninna boru nai tu pahoppu ni amanta on, ai boasa sai tutup mata hamu naso dibege hamu do nahudoki nga nasannakaning sidung martangiang, toe mangan be ma aha silomo niroha nabe dibuat be ma,”mana amennya oppung ninna pahoppu nai antong, ba ai nagabe dohot do sitagelleng on manusai iba, tor hehe amantai, tole mangan ma hamu parjolo annon pe au mangan…..
[Balas...]
Sianturi :
Je molo na hea hubereng sahalak sittua do mamuruki sahalak sittua tong. ala maganjanghu tangiang i dimuruki ibana amanta napasahatton tangiang i. “Ai ganjang ma tangiang ni bayon” uhut dipokkihi indahanna. Hape sahalak sittua amantai dah, nga tok jippian i.
[Balas...]