Letjen H. Purba Sian Pakkat
Oleh : Amani Harapan Marbun – Cikarang
Ndang na mandok dia suhutan on, jala molo tung dijaha na margoar di suhutan on, holan martaringot tu goar do, dang adong maksud nami lao mambaen sada sipalessem.
Molo jaman andorang so masa nanidokna Reformasi, ditaringoti akka Polisi, tentara manang ABRI tor songon na humordit jala mallobok do taroktok. Tarlumobi ma tahe molo songon na adong parsoalan tu nasida, sitau talu ma iba. Jala marlomba-lomba do natua-tua pasikkolahon anakkonna anggiat adong nian naboi masuk tu polisi manang tu tentara. Dang holan i tahe, molo attar adong do pamili manang sisolhotna gabe polisi manang na tentara, sai tor dohot do iba gabe tong tentara, pinakke do nanggo pala baju ni tulang tentara on, nang so i molo sikkola pe agiat adong nian tas rangsel ni tentara on, ido sada ‘kebanggaan’ di jaman i.
Molo tung dang adong sian pamili manang sisolhot na gabe polisi nang tentara, dipear do mampabiar-biari jolma, pinomat ma dibaen ma nomor ni mobil manang motorna naung binoto, nang pe so adong aturan na na ikkon i nomor ni polisi. Isarana rupani, molo di jakarta on, sude do jolma mamboto molo leter ‘Q’ di pudi ni nomor ni moto i, nga diboto halak, motor ni POLISI, manang adong do hata pandohan na hasomalan mandok, ‘Keluarga” ninna. Jaman sisaonari on, nomor BP di pudi, ninna nomor ni akka polisi ma on, marmassam ma tahe
Ra tahe, toho ma i, tung na mansai maol do molo adong parsoalan tu nasida, dijaman i.
Dinasadari, dung sidung mangarepas akka mobil Sampri nadi Padang Bulan medan, jala tutu, nunga borhat be Sampri on tu sude akka situjuonna, tu Pakkat, Parlilitan, Sidikalang, PAngururan, Dolok Sanggul, nang akka na asing. Dipahundul amanta kapala pool on ma di loket i, dibagasan panuhoran tikket i. Tarbereng ibana ma sada surat na peak-peak solot di lambung lubang-lubang ni panuhoran tikket i. Songon na biasa, diboto ibana do na surat binoan ni supir sampri do sian huta i, tu akka pamili na adong dimedan. Biasa do Mobil Sampri on mamboan surat, ia so i barang, nang hepeng sihumisik tu akka parsikkola. On ma songon sada ‘service’ nasida tu akka calon penumpang, huhut mambuat rohani jolma i dihitaan asa sai mamakke Sampri nasida molo lao tu Medan.
Mansai godang do tahe akka service na binahen ni par-angkutan tikki i, olo do nadeba, bayar dihuta akka parsikkola i, lapatanna molo dung sahat pe dihuta, asa dibayar ongkosna. Sobinoto ise mambaen ‘strategi marketing’ sisongonon, alai tarida do na tutu do oi, marodor-odor do jolma i tu Sampri on.
Holan dijaha amanta mandur on tujuan ni surat on, pittor bolak-bolak ma bohina, marlangan ma ibana, ala dibereng ibana goar situjuan ni surat on, ima amanta Letjen H Purba, jala di pittor hatop ma disurakkon ibana tu akka supir repas na hundul-hundul di loket i.
“Ai ise mamboan surat on…?”
“Par-146, sian Pakkat do i lae ” ninna sasahalak, maksudna 146 ima Sampri Nomor Pintu 146, na ro sian Pakkat.
“Bah….ai boasa dang diantar on surat on? surat nantoari do muse, ai naso diboto hamu do tu ise surat on? nga masalah innon on, sotung sanga ro ma inon Pak Purba on,..taruhon jo lao, jala tor hatop minta maaf hamu…” ninna tu akka supir i, jala di patorang ibana, Sahalak Letjen do nampuna surat on. Molo dang hatop di ditaruhon, hape habotoan na sangkot do surat on di loket, olo gabe parmasalahan.
“sai gait dibahen hamu tu Sahalak letjen, hape dua minggu na lewat, nunga dipasingot kapten na sian TArabintang ala tarlambat sampri borhat….hatop ma hamu” ninna ma huhut ma nga mallobok be taroktokna, ai sanga ro ma innon muse Letjen on tu loket on, suda ma au
Hatop ma dijalo supir repas ma surat on jala dihumalaputi manaruhon tu Jl. Karet 5 no 36B Perumahan Simalingkar. Jonok do nian sian loket i.
Sai dipanotnoti ma sada-sada nomor ni jabu i, sotung lewat jala asa hatop sahat, mulai sian Jl Karet raya sahat tu Karet 5, sai dibereng, alai dang dapotsa. Na adong di ida ima jl. Karet 5 Nomor 36 do, hape di surat i dibaen 36B. Bah…nasalah do surat on?….dia do naeng alamat on, ninna supir on dirohana.
Dijolo ni jabu i, adong ma sahalak songon na manjaha surat kabar hundul-hundul, apa pas di parso ni mobi na mangantar surat on. Tuat ma supir on idaon, lao manukkun alamat tu amanta na hundul nakkinon. didok supir onma. “Lae…manukkun jo tahe, ai dia do nomor 36B, jabu ni amanta Letjen Purba?”
“Nion do lae, apala aha lae?” ninna amanta parjabu i.
“Bah..ido? namanaruhon surat do au tu Amanta Letjen Purba…” Ninna songon naso yakin supir on manukkun
“Dia ma siani, au do i…” Ninna amanta on.
“Pak Letjen H Purba?”….songon na bolak bolak ma bohini supir on, alai songon na so persea do ibana mamereng amanta on na salahak Letjen.
“Olo…” ninna amnta parjabu i, huhut dibukka pintu gerbang i.
Ala dibereng songon na ragu supir on, didok amangta ima, “Au do lae, nion ma KTP ku” ninna huhut dipatudu goarna Letjen Hamonangan Purba.
“Maksudhu….ai…..” dang sanga dope ditorushon supir on hata na i tor dialusi parjabu ima.
“Olo…..dang gelar i lae,…goar hu do i, letjen purba…..”
Lao ma supir on mulak jala mekkel sandiri di mobil na I,…letjen purba sian Pakkat, jala dung sahat ibana tu loket sampri muse, mekkel situtu ma ibana huhut ma di suhuthon tu akka dongan na na adong disi, jala rap mekkel ma nasida mambege suhutan i, ima taringot tu amanta Letjen Hamonangan Purba sian Pakkat….
Merdeka Pak Letjen!!!!
—-o0o—
artikel ini telah dibaca sebanyak
kali
Berita lain ...
Komentar via ID Facebook Anda, silahkan Login...:
12 Responses to Letjen H. Purba Sian Pakkat
Leave a Reply
Ampun jo Lae, anggo tu cerita on ikkon bahenon ni Lae hinan do Catatan: Bila ada kesamaan nama, gelar dan jenis kelamin, dst., dst…
Ai mangolu dope pelakuna dilului annon ise do penyebar berita on.
Alai tarsingotna ise do tahe A. Bertran i? Parpakkat do i?
[Balas...]
Hebat nai hape hita on akke he…
Adong do hape naung marpangkat LETJEND sian hutatta. Ineeng apala ipehian huboto on. Ale nga pengsiun be ra amattai akke?
[Balas...]
Molo huboto Amani Bertran marga nainggolan do.
Horas,
swy
[Balas...]
Bah tahe, molo so sala au, hutanda do Lae Letjen Purba on. Par Batu Gaja, sikkla di SD RK, SMP RK 2.
Alai bage huingot muse tikki di Univ. Sanata Dharma Yogya, adong tong margoar MAYJEN (marga Saragih manang Purba Girsang??), par Abbia alias Saribu Dolok. Di dok hami ma imana MAYOR JENgkol..hehehe…
Halo lae Mayjen….aha kabarta ambia. Sehat do ham di Tasikmalaya? Unang sai mandoding ham ijah, sotung dilojong boru Sunda ae ham akkin…Dingat ham mulak tu Saribu Dolok, pa boa ham kabar tu ito si jengesan boru Girsang ae da…wakiakakaw..
Horas…sian Tengjen (Tetangga Jendral)
[Balas...]
Lae Amani Bertran…hubaen do dah….jaha l;ae mjo on
“Ndang na mandok dia suhutan on, jala molo tung dijaha na margoar di suhutan on, holan martaringot tu goar do, dang adong maksud nami lao mambaen sada sipalessem.”
iteng….
[Balas...]
Neaah, on ma. Sek godang goar dohot ceritra/suhutan na sarupa manang na mirip, je menurut ahupe, ndang nasipalessem i.
Songon nasarupa tu goarhu pe ra nga gok dihuta, songon sada contoh tu abang hu Dokter Hardi ma jolo dah, nga sarupa goarna tu amanta penasehatta,
Hahahahaha…….
Je najungkan i pe kale-kale (sekitar tahun 80′an) adong do hu boto pangaranto sian hutanta na margoar si LETNAN. je dukak-dukak dope ibana nga jadi letnan. immaaaaa……
Dungi museng dah, boha museng ma taringot tu na margoar PANGERAN ? Hapengna amantasida Raja pe daong, alai ibana jadi Pangeran.
Songon i musengma tu na margoar RAJA , sedangkan daerah harajaonna pe ndang adong alai nga didok ibana RAJA. hahahahahaha………
Mantap hian ma akka goarna i kan ? (seorang Letnan, Pangeran manang Raja) hehehehe,,,,,, immaa..
Horas Jala Gabe, Tetap Semangat dan GBU Amen.
[Balas...]
Dalam sekali maknanya, terutama bagi orang2 yang punya saudara angkatan. Menyinggungkah atau just kidding?
[Balas...]
beta tu pakkat mar – guru,ninna jolma ma hubege na jolo do dolok sanggul,hape ahu par – pakkat (ala di dlk sanggul hian ahu sma),bah rohakku hebat nai pakkai i ate,gabe masitandaan ma hami hape marga purba,gabe mar cerita ma hami,lao marguru ibana tu pakkt,ala di boto ou parpakkat gabe mabiar ma ibana tua au,gabe hudok ma muse,sian huta nami ikkon sanggup do manginum rasun dohot paridi gadam asa boi ro tu pakkat nikku ma alus na,gabe mabiar ma ibana mamereng ahu,dang be hea olo ibana massam-massam tuau….teng ale inang…baen tuak i
[Balas...]
sahali nai molo adong kiriman sian huta sukkun hamu denggan unang jolo sahat tu medan baru bingung olo hona bursik dibaen natua-tua,manat-manat molo manupiri apalg molo jln mlm.
[Balas...]
amangoi.. amang… satonga mate au mekkel kale manjaha ceritani amanta si Purbaon, dang tartaon au hubayakkon bohini supiar namanaruhon surat i, tarhatotong ma rai akke mamerengLetjen i. ai Letjen sian dia do amantai?? atik na hutanda doi ?? hebat22 do Parpakkat on tahe bah tok malo2 hian mengkarang cerita…mauliatema godang do akka namalo par pakkat dohot namalo marende..
[Balas...]
Horas !! aha kbr anggi Risma hami di Palembang sehat2 do ondo partukkoan on sai hujaha2 gabe godang na tinanda.
[Balas...]
Tikki doli-doli au, marsitta-sitta do au mambaen goarni buhabajukku; molo boru baenon ku ma goarna si Maretta, molo baoa baenonku magoarna si Residen. jadi molo manjou au annon angka kale-kalekku ndang be goar hi di jou bage goar mar amani nama. jadi bolo boru do buha bajukku jouon ni angka kale-kalekku ma au Pa’ Maretta, molo baoa, jou on ni dongan ma au Pa’Residen (Pamaretta dohot paresiden). Alai hu pikkir, ah ndang denggan songoni. Alana boi do bage tarsoppuk dongan, bage sada parekkelan, tar songon suhutan ni si letjen purba i. Jadi nang mambaen goar ni dukak pe ikkon manat do iba. olo do goar i bage mambaen hanganlan di akka dukak. songon sontoh, goar Makkirim Sukses. Holan tinggal di pakkiriman man on dang hea sukses. Teeeeeekletek majol nai akke molo dakot masongoni. Horas!!!! GBU
[Balas...]