Hulean Putas Guru

Oleh : Amani Harapan MArbun

Adong sada bah, satohona suhutan ni dongan tingki gelleng do nian alai disuhuthon ibana asa nituri-turihon tu angka dongan panjaha, atik boha adong nampuna pengalaman sisongoni. Dang pola situdu goar manang sian huta dia, manang marga aha nian na adong di suhutan on. Jala molo tung adong na hona tu suhutan on, dang pola boha ateh, namarturiturian do

Tangkas do taboto molo disihamet-meton najolo, tung marasing do pangalaho ni dakdanak tu jaman saonari on. Ai molo najolo, ala mardomu tu tingki hasusaan, hapogoson gabe marragam do tahe pengalaman na paet naboi gabe si ingoton saonari. NAjolo boi dohonon dang hea nitiop hepeng sihumisik songonn ‘uang jajan’ molo sisaonari. Ni ingot dope, holan ari minggu na i do dileohon natua-tua on di iba hepeng sihumisik i. Nunga tung las roha disi. Jala songoni do nang diparsikkolaan pe, tung paet ma tutu najolo molo binereng angka jolma parsingkola sisaonari on.

Ia kedan on, andorang singkola SD dope najolo, nang pe adong utohutokna, sahalak na malo ibana, tarlumobi pistar marmatematika dohot marbahasa indonesia, alai sai na adong do dajal-dajal ni on. Molo dihuta nami didok ma on ‘pango-pango’. Olo do diganggui akka donganna marsiajar, molo pala nunga sidung tugasna nanilehon ni guru pangajari i. Ni ingot dope, olo do sada guru mangajar dua kalas ima ala so adong guru. Ia bayon nunga kalas lima. Songon nahudok nangkinon, ala sada do guruna tu kalas opat, marganti soring ma guru on mangajar na sida.

Dilehon guru on ma parsiajaran maretong, jala didok ma unang guntur jo dah, asa mangajar jo au tu bariba ni kalas an, jala molo nunga sidung dikarejoi, hohom ma jo di bangkuna. Jadi bayon si Bangun goarna, ala jolma napistar do, pittor hatop do dibuat pulpenna, di karejoi etongan nanilehon ni guru ondeng. Tutu ma. Dang pigadan, nunga sidung be ibana, jala dibereng nahumalianga dang adong dope nasidung donganna. Ro ma turohana lao manggutturi donganna. SIpata ma pantarikkon pulpen ni donganna sipata marlojongi. Sipata marendei, bohama asa guntur angka donganna.

Ala nunga gear ‘macca’ i dibariba di kalas 5 on, hehe ma guru on sian kalas opat. Dibereng ma kedan on, si bangun on, nunga manontori dibangkuna, dungi didok guru on ma.

“Bangun, kesini, kamu dihukum, bawa bukumu ke meja guru……”

Mabiar do antong kedan on, jala pintor hatop ma didapothon guru on jala diboan nanidokni guru on, dungi didok guruonma, Songon hukuman, surat on.

Dijahahon guru on ma ” Adong manukhu sabara, godangna saratus, ro ma hosuk dibuat ma sada, tinggal ma siapulu sia, ……Adong ma manukku sabara, godangna siapulu sia, ro ma hosuk dibuat ma sada, tinggal siapulu ualu….Ima surat, ikkon habis ma manuk i….

Maksud ni guru on asa sip jala asa hohom do ibana manurat sahat tu na tinggal sada manuk on tontu leleng do innon surathononna i, paima sidung ibana mangajar di kalas na asing.

Dioloi kedan on do antong uhum na ni lehon ni guru on, jala dimulai ibana ma disurathon ibana ” Dijahahon guru on ma ” Adong manukhu sabara, godangna siapulu ualu, ro ma hosuk dibuat ma sada, tinggal ma siapulu pitu, ……Adong ma manukku sabara, godangna siapulu pitu, ro ma hosuk dibuat ma sada, tinggal siapulu onom”.

HApe olat ni ‘siapulu onom’ kodo nunga loja ibana, “bah….leleng nai kodo hape asa habis manuk on…aha ma akkal, nga loja au” ima na ro dirohani kedan on. Sai marpikkir ma ibana, didok rohana ma molo husuru donganhu mangurupi manurat, tontu dang olo, alana nasida pe tong kodo marsiajar mangalusi etongan nanileho ni guru on.

Alai dang sadia leleng dope nunga tor masurak ibana muse, sidung!!! ninna ibana

Mengkel ibana dibagasan rohana, jala tor marinjak ma ibana muse manggunturi donganna. Sian na hohom hian, hape pintor tompu guntur, gabe longan ma rohani guru on sian bariba ni kalas i. Roma guru on, didapothon kedan, si BAngun on, jala dang porsea guru on songoni hatopna disurathon nanidokna i, mulai sian saratus sahat tu sada.

” Ai dia do nanisurat mi, boan tuson ” ninna guruon huhut hundul di meja na i. Alai iiparateatehon guru on, dang gok salembar harotas i.

“Boasa holan on…?”

“Ido bapa, olat ni ido, ai Nunga suda be bapa manuk i” ninna kedan on
“Bah!!…ai aha do huroa disurat ho??”
” Ido bapa, Nunga be, ai ninna rohakku ai anggo hosuk do sada-sada allangon ni i, asa hatop habis manuk i, tor HUPUTAS bapa…..”

Dung di jaha guru i nanisurathon ni si BAngun on, songon ma dibahen disi

” Adong ma manukku sabara, godangna siapulu onom, ala sai ro hosuk, tor huputas manuk i, gabe mate sasude….”

Dang tardok guru on be manang aha, alai anggo dirohana, Iteng ! ! ! !…matekki, au ma hape oto-otoon nion, alai ala di ingot ibana do nangkinon janjina, holan asa suda do manuk i, gabe sip ma guru on.

- – - – - – - o0o – - – - – - – -

Dung haluar singkola, pintor hatop do ibana marlojong tujabu, bohama songon hata patujolo nangkinon, dang adong masa sihumisik uang jajan. Molo male, ingkon mangan dijabu do. Di ingot ibana, tabo do loppan sadarion dipature natorasna, ala nansogot dibege ibana do natorasna baoa marsakkap mamio amanta pendeta nabaru i mangan tu jabu. JAdi nunga di hobasi indahan, jala di ida ibana do, na Ikan Mas na bolon, nasian tobat dipudi ni jabu i do dibuat amana.

Jala andorang lao ibana tu sikkola nansogot, nunga ditonahon ibana tu amana, asa di ibana deba tonga-tonga ni dekke mas i. Di olohon natoras do antong, alai didok ma jolo mangan ma amanta Pendeta i.

Toho ma, di ida ibana nunga martua mangan tamuae nasida i.

Alai ala di ingot do poda ni amangna, di pasip ibana do lao hundul huhut songon na marsiajar, nangpe diarahon amanta pendeta i manrsipanganon ibana, ” tuson ho bere” ninna. Alai dipadao ibana do ala nunga di bereng jonggor mata ni amana.

NIan, nang pe dao, bohama kedan on, nunga male hian, sai dibonduti ma ijurna, molo attar angkat amanta pendeta on tanganna laho manganton sampohul, sai tor dohot do ibana songon na mambondut. Ala ni loppan na tabo i rupani, lakku do mangan tamue on. JAla tutu, habis do sambola dekke mas on.

Alai, hokan dipabalik amanta pendeta on dekke mas on, dang tahan be ibana, pittor marsurak ma bayon didok ma “Bapa….nunga dipabalik be……..”

hehehehe….imajo tusi ateh!!!….karejo ma jo….sai lalap marsuhutan

telah dibaca sebanyak kali

Berita lain ...

• Dung Lam Matua…
• Dirimpu Rumbi
• MANGAN MANOGOT TINGKI SINGKOLA
• Jambar ni Parrasun
• HUTA HUTA DO HUTANAMI