Dung Marjakkar Tarutung i…
oleh : Rikardo E Marbun
Ra sude do hita mananda JAKKAR NI TARUTUNG. JAKKAR ima BUNGA NI TARUTUNG. Mulai na jukkani sahat tu numaeng, marmassam do akka “mahluk hidup” na mangharingkothon bunga ni tarutung manang jakkar on. Tardokma i akka, PORHIS, ARIP-ARIP,BOLLONG-BOLLONG (HARINUAN),PIDONG MECCET-MECCET, LOPPONG nang HALUANG. Suang songon i do nang MANISIA alias JOLMA. Molo akka hewan liar i, langsung do na dibatang na i dope dioccopi cairan manis (aek na tonggi) na lohot di bunga / jakkar i, alai ianggo akka jolma (terutama dukak-dukak) ikkon jolo madabu pe jakkar i sian ranting ni tarutung i. Alana dah tuk tonggi do cairan na menempel di bunga ni tarutung / jakkar i.
Molo dihitaan (di PAKKAT) naujui, Haluang na sai tagi/ hisap mangoncop jakkar ni tarutung i, olo do bage sada tudos-tudos dibahen jolma i tu akka donganna. Didok ma i ” Ach ! JOLMA HALUANG on ” ninna. Alai ianggo makna ni tudos-tudos i, ndang jelas botoon, manang alana tagido mangoncop natonggi, manang alani rupa nihaluang na alang songon B2 jala bentukna songon pidong (ala boi habang), ndang binoto. Je tergantung tu persepsi penekanannabe ma.
Je taringot tu JAKKAR on, najolo adong ma kejadian di huta ni Oppung nami (di Laksa) na uju i songon on. Dilambung jamu ni Oppung nami i, godang do batang ni tarutung. Je pas ma daba tikki i MARJAKKAR (marbunga), je godang ma akka mahluk hidup nakkin di ginjang laho mangoncopi bunga/ JAKKAR ni TARUTUNG on, suang songon i ma nang akka DUKAK-DUKAK pe tong ma marsiraruk/ rebutan laho MANGALALANG jala MANJOPPUT huhut MANGONCOP aek natonggi na lohot di JAKKAR ni TARUTUNG i. Dinamarsiraruk i (rebutan), olo do sampe magosgos tangan manang pat suang songon i nang salok/bohi ni dukak-duak i pe ala ni na masiunjopan marsigulut be.
Holan madabu JAKKAR i sian ginjang, ittor marlojong do akka dukak-dukak i manjomput huhut ittor mangoncoppon aek na lohot-lohot i. Goarna ma NA-MARSIRARUK, berarti BERLAKU HUKUM RIMBA ” SIAPA CEPAT DIA DAPAT “.
Molo adong dukak i na dapotan, dung habis dioccophon aek na i, ittor haruar do hatana mandok ” Ach SABAS HIAN BAH, TOK GOK DO AEKNA I, JALA TONGGI HIAN MUSENG ” ninna. Alai molo dukak na talu marlojong jala ndang DAKOTAN, ittor DANGOL do dihilala, alana DATUNG masa MAMBALEN / mangido bagian.
Je disada rombongan ni dukak-dukak i, dohot do si JA’ALTUP.
Ala jut ni rohana, setiap marlojong, sai partaluan ibana, holan akka donganna ima na dakotan jala GAJEAN (mahapan) mangoccopi jakkar na dakot DILALANG na i. “Sialan !, unggodang dapot halakan sian ahu”, inna rohana.
Pas ma lagi dipudihon akka dongan na i dompat batang ni tarutung i, ittor “mangiccir jala monjab-monjab ma si Ja’altup on monggop tu Batang ni Tarutung i. Hira-hira 2 ( dua ) menit, mullop ma museng ibana, didapothon akka donganna na sedang asik mamilliti aka jakkar na marserakan di duhut-duhut i, biasana molo songon na segar jala ias dope jakkar i, berarti nabaru MADEPPUK (MATEK-TEK/ MADABU) pe i.
Dung di dapothon ibana tu akka dongan na on, attar dipaula ibana ma songon balik kanan gerak, mardompakhon tu batang ni tarutung i. Holan adong madabu jakkar dompak tu batang i, ittor dilojong ibana, jala didok:
“Neach ! dakotan hian ahu kale-kale!, inna ibana attor songon SIPANGGARON.
Setiap adong madabu, ittor marlomba marsiraruk be do sude akka dukan-dukak i, sipata olo do sampe MASIUNJOPAN, MARORJAR holan marsiraruk mandahut jakkar na peak i. Pas ma museng madabu dibalik ni batang na i, akka dukak-dukak i pe, marsiraruk ma jala masionjaran. Holan dapotsa JAKKAR i, ittor langsung do dioccoppon na dapotan i aek ni jakkar i.
Dung marsiraruk nasida, ittor sijopput diibana be ma akka jakkar na peak i.
” Mantap hian ma, tok gok aekna akke ?” ninna si Ja’altup on tu akka dongan na i, huhut dipangapusi be akka sikkuna alana nga marlamutak pasir dohot akka duhut-duhut basahan nang bajuna be.
Adongma 3 halak donganna i ( rap mangalusi (hira na mar koor),masialus-alusan mandok :
-” Ido akke ? sian nakkin dang ‘ta lalang dison ningon dah, hapeng dah dison do ASARNA ? ninna si Olpot
-” I tutu, marradakan ningon dah. Alai songon na adong otik ACCIM-ACCIMna akke ? ninna si Jamot komentarna.
-” Ahu peng, lima dakot ahu di namarsigilut i hita, nanggo sada pe ndang adong natonggi, sude massim-massim,sumalim sian na di sabbola an akke ? ninna si Jenggo pandapotna.
-” Ra, na diijuri haluang do ra nabodari i. ninna si Jamot, komentarna.
Umbege komentar ni donganna na tolu i, sai tarserom ma Si Ja’altup, huhut didok.:” MATTE BE HO DEBA-DEBA, AKKA JOLMA HALUANG !,TAOOOONNNNNN ” ninna ibana.
-”Ndang na diijuri haluang i, anggo inna rohakku na di uttuti porhis do ra i”, ninna si Olpot sok yakin.
Alai ianggo si Ja’altup, nga sai mate na mekkel i, mamparekkeli akka donganna na mangoccop JAKKAR na ACCIM i. Huroha,umbahen nabage maccim jala bage godang pe aek ni jakkar na dibalik ni batang na i, alana memang na habis di KONCINGI si Ja’altup i do akka jakkar i ditikki mangiccir ibana tu batang nai.
hehehee….. memang sai naadongadong do pangalaho na suhar, alai tutu, hasil pengamatan do on, datung ma pengalaman pribadi. Je dihita samudekna kale-kale, atik adong songon nanaeng “MAR-NOSTALGIA MANGALALANG JAKKAR NI TARUTUNG ” topek mulak tu hitaan, manat-manat be mamillit akka jakkar i dah ? sotung dakot na Accim !. hahaha……..
Berita lain ...
Komentar via ID Facebook Anda, silahkan Login...:
10 Responses to Dung Marjakkar Tarutung i…
Leave a Reply
oooo hebat ni suhutan on. alai denggan do molo minum na accim i.. gok do hasiat na.penelitian di India ala minum air seni gabe malumsahit na jala pisik segar.. je akka naminum na accim nadilaksai ito pasti sehat2..
[Balas...]
Sittong do rai ito, alai ikkon accim si kadi ibana sandiri do,
Datung ma na accim ni halak da, Bah bage BAU MANGIR DO I NIMMU MA!
hehehehe….
Horas Jala Gabe, Tetap semangat dan GBU, Amen.
[Balas...]
kkwkawkakwwaak, tek sappe loja au namekkeli hamuna…..
ise manaeng i akke?
[Balas...]
Kwaaaaaaaaakkkkaaaaaaaakaaaaaaaaakkkkkkkk……, satonga mate iba mekkel alanai Jakkar na accim on bah.
[Balas...]
Kwakakakaaaaakk mekkel au ..ittor huingot najolo di Pakkat tulang Ricardo on alana di jolo ni jabunasida i tok godang do batang ni TARUTUNG dohot di samping ni jabuni Omp.Raja Marbun je ido naeng na diingot tulang on akke hahaaha..pengalaman na najolo tikke si hamenehon nasida. dakkodo marjakkar tarutung i alai anggo passa2 na nga dibaen hian.alai anggo na accim i dak huboto i nasida do umboto iiiii
[Balas...]
Hahahaha…… holan jong-jong kale PASSA-PASSA i, Ndang nanggo lobi 5 ari, nga ittor adong ra na-MANGORGOS i, ningon dah.
Hehehehe……… mungkin si Gandhi do ra i, songon na ” BUAT DAI ” tu tiang ni passa-passa na imbaru i. hehehehe…… tok jayana ma i take !.
Horas Jala Gabe, Tetap Semangat dan GBU, Amen.
[Balas...]
Tutu dihitaan, ndang holan dukak-dukak na ahli strategi penguasaan tempat songon na marsigulut mambuat JAKKAR NI TARUTUNG i, akka NATUA-TUA/OPPUNG-OPPUNG pe tong do jago jala ahli strategi dalam penguasaan tempat / kavling.
Molo sai taparate-atehon di sada tempat na marhabot ni roha (di namatean), tardok ma sai ittor adong do sada-sada oppung-oppung i na toppu tangis jala dipagogo soarana mulai sian na dao sampe jonok tu bakke ni na mate i.
Antar songon on ma kani :STRATEGI NI OPPU MINGOR MENGUASAI KAVLING PARHUNDULANNA.
Tardokma diparmonding ni Oppu DANGOL (misal,goarna), tok gok do ro akka jolma i ro manikkir diparmatena i. Ala godang ni na roi, mansai tok ponjot do di tonga ni jabu nang alaman pe.
Ditonga ni akka jolma na hohom i, toppuma tarbege diluar adong oppung-oppung (Op.Mingor) mangangguk gobar manjou-jouhon goar ni oppu Dangol naung monding i, alana memang ndang nanggo siat be ibana naeng masuk tu tunga-tonga ni jabu i.
Tarhatotong ma saluhut akka jolmai, jala didokma songon on :
” PASIAT HAMU, PASIATHAMU Inanta (Op.Mingor) i, ninna.
Nadeba nai mandok:
” LEAN HAMU, LEAN HAMU DALAN I TU NASIDA !” ninna nadeba.
Ianggo Op.Mingor on pe tutu, bage lancar ma dalanna, mulai sian alaman sahat tu tonga ni jabu i.
Ditonga ni jabu ipe kani, attar songon na dipagogo ma andungna i : ” AI TOK GIRA NAI HO LAHO OPPU DANGOOOLLLLLL,..OOL,OOOL,OOOOL ” sai ninna ibana huhut mangalakka nanget-nanget, alana songon na adong sukkot akka patni na torop i.
Jolma naasing ipe sian nadao, didokma tu akka nasukkot i, :
” PASIAT HAMU INANG, GESER HAMU SAOTIK, ASA DIBERENG NASIDA JOLO OPPU DANGOL I ” ninna.
Umbege i, margeser ma tutu akka jolma i,
Molo songon na adong muse manukkoti dalanna, tangisna ipe DIPULTANGma gogo-gogo. Natorop ipe, minggirma, jala tambah lancar ma langkah ni Op.Mingor i.
Holan sahat Op.Mingor i dilambung batang ni namate i, tong do dipalu ibana tangisna i.
Holan ndang be diparateatehon jolma i tangisna i, ittor dipasang ibana ma matana. Huhut mulai dipananget tangisna i, MANAILI ma ibana tu HUMALIANGNA.
Mangangguk nanget-nanget, huhut sibuk matana mangalului tempat parhundulanna na strategis.
Dung dapot matana tempat na strategis, MARGESER ma ibana nanget-nanget, jala volume ni tangisna pe huhutma dipagelleng,songon na tarisak-isak.
Dung dapot ibana hundulanna ittor dipotordang ibana ma parhundulna jala posisina pe DIPAJURNGANG. Akkup tusi SIMAKUDAPNA pe, langsung ma SIP ! LUPA nama ibana ditangis andung-andung na i.
Ndang sadia leleng dung sip simakkudapna i, ittor SIBUK nama ibana MANUTAK NAPURAN nang GAMBIRna.
Huhut DIATUP ibana Napuran i, sahali-sahali mekkel do ibana huhut marsuhutan tu dongan nadilambungna i.
Puas ma Op.Mingor i distrategina i, tombus dihilala dapot ibana nungga Kapling parhundulanna na pas, alana hira-hira 30 Menit nai, memang naeng waktu MANGAN nama.
Attar songon ima sada strategi na nabinahen ni Op Mingor asa dapot ibana posisi na pas mandapothon waktu naeng mangan. hahahaha… ima OPPU MINGOR !!!!!
Horas Jala Gabe, Tetap Semangat dan GBU, Amen.
[Balas...]
Wakaka….sappe neng mittop. Ha..ha..ha…..halahe….wakaka…
[Balas...]
Kwakakakkkkkk…….. malo nai oppu Mingor on akke attar dibaen ma tangis nai mulai sian luar/halamanna ni jabu ni Namonding on heik….heik…. sai hira polantas/ polisi lalulintas ma oppu Mingor lean hamu dalan ninna hape dung sahat ibana tujuan na ittor hundul,mangan napuran jala di bereng humaliang na dison ma au hundul satokkin nai lao mangan nama
[Balas...]
topek nai sarita ni Jakkar ni tarutung akke nattoari kodo mar jakkar alai manogoton gabe TARUTUNG haha…ha…TARUTUNG MONTONG LAGI…
[Balas...]