Babikku…..babikku….

Alani haserepon ni roha, hapantunon, haja haringgason ni amanta si Japikkir do umbahen na di gogohon akka dongan na sa-weik i ibana gabe sintua. Jala ido tutu, toho do pandohan ni jolma i hian andorang so di tabalhon ibana gabe pangula na gok, didok akka dongan na sahuta do, “takkup do hamu gabe pangula, jala tabo begeon soara muna.” ninna akka jolma na ro tu lapo nasida, ai marlapo do anggo amani Japikkir masai.

Dung hira-hira piga taon ibana gabe pangula na namarguru, burju marminggu, jala ringgas do tu partangiangan nang tu akka ulaon na pinatupa ni huria i. Dang adong tahe parniulaan ni ibana na hurang na gabe panundati panabalon ni hasintuaon di ibana. ” Olo tahe, ningon, ai singoni nang dongan saripena pe halak na unduk marroha, polin di pangalaho nang pantun dipanghataion, suang songoni ma nang ianakkonna pe sude do taratur, dang adong dapot akka hata nang pangalaho na humurang sian akka gellengna” ninna akka inanta diparonanan hatiha i.

 

Ia amanta amani Japikkir marlapo do nasida jala partiga-tiga jagal pinahan manang molo diistilahon tu jaman sisaonari on, parruma makkan jala parruma potong do nasida. Dibahen ringgas ni rohana, dipahan nasida do akka pinahan di pudi ni jabuna, jala godang do pinahan ni nasida. Ai andul tu pangalaho, songoni nang angka pasu-pasu do dapot ibana, songon hata ni sijolo tubu “Sinur na pinahan ninna, Gabe na ni ula, jala horas jolma di ruma”, i do tahe, ai sada ripe na bolon do nasida jala nungnga marhagabeon marnak sampulu tolu. Anak do hagabeon, ido anggo dirohani amani Japikkir.

Diluat i, dang pola dihandangi pinahan, holan di palua do pudi-pudi i, ai molo nga dapot tikkina mangan pinahan i, potang ari manang mnogot i, pittor marpungu do pinahan on dipudi ni jabu i, jala anakkon ni amani Japikkir ma mangalehon mangan pinahan i. Dung sidung mangan, ba lao be ma akka pinahan i mangardapi na humaliangsa. Dang songon jaman sisaonari on, ikkon di hurung nama pahan-pahananna.

Dung ditabalhon amani Japikkir gabe sintua, hatop do ibana dapot ulaon manang molo didok diluat i ‘martikki’ onma nanidokna molo dang marjamita, maragenda, molo dang i manjaha tinting dohot dijaha ende.

Diari minggu i, martikki ma ibana ima maragenda, andorang i nungnga diapil-apil ibana hian boha laho manjaha bukku agenda i, jala nai Japikkir pe olo do diingothon niolinai didok “Hurang hantus dope bah panjahami di patik-patik i,…ulangi jo muse” ninna, huhut ma muse diulahulakkon amani Japikkir na maragenda on, nang Nai Japikkir holsoan do ibana, tung gabe sala ma annon dijaha agenda on, hape ondope parjolo sahali jonjong dilanggatan, gabe maila iba tu angka dongan pararikamis, ninna dibagasan rohana.

Tep ma ditikkina, nungnga jonjong amani Japikkir di langatan i, dijahahon imana ma, “songon singkat ni patik dihita, ta jaha ma sian na sappulu i, ima patik ni Tuhanta, patik parjolo….” huhut ma dijaha ibana takkas-takkas, jala nai Japikkir pe sai sipanotnoti sian bangkuna.

Sahat ma tu patik pa onomhon ” Unang ho mamunu,….Babikku” Ai tor dibege ibana marngiak babi di pudi nigareja i, tor lao ma rohani ibana, mandok babikku, dang sadar ibana marsoara ” babikku ninna manguduti patik i” . Ai, di jaman i, dang piga dope halak markamar mandi, molo bahasa saonari mar-wc, ai akka WC na mardalani do pe masa tikki, jala tupudi-pudi ima, tubalik ni batang ni hau na bolon jolma lao molo mangarotaki, jadi olo do dihutton-hutton pinahan on jolma na mangarotahi i, ujungna molo nga ro parenta naso tarjua i, sai di buat do lombut-lombut, hu na ganjang mangalele pinahan i.

“Patik pa pituhon, unang ho mangalakkup…..babikku” ninna ibana, hape na marngiak do dibalik ni gareja i.

“Patik pa ualuhon unang ho manakko,… babikku” ninna muse, ala marngiak muse di pudi ni gareja i.

Ditorushon amani Japikkir do muse agenda na on, nang pe nga mulai gear jalah hebar jolma, ai takkas do dibege jolma torop pandohan ni amani Japikir. Jala tingkos-tingkos do di uduti ibana muse agenda on

 “Dang jadi haliangan ni roham..babikku, babikku…Ai Bereng jo pinahan an japikkir, nga direong jolma, nga dilombuti jolma…nga gabe targanggu iba” ninna ibana sian langgatan i tu anakna si Japikkir ala dibereng ibana diluar, dijoloni gareja i marmeami, dang sadar be ibana, ujung na mekkel ma jolma torop i mallakaklakak……..

 

Berita lain ...

• Dung Lam Matua…
• Dirimpu Rumbi
• MANGAN MANOGOT TINGKI SINGKOLA
• Jambar ni Parrasun
• HUTA HUTA DO HUTANAMI