Babaniamamma, Begu…

sumber : www.latteung.wordpress.com

Oleh : Latteung

Dang sadia leleng, dung hundul sude panuppang ni motor sampri i dihundulanna be, sai jumolo do dipasingot ibana atik na adong kodo na hatinggalan boan-boanon ni akka panuppang i,  dungi dipadalan amanJamordong ma nanget-nanget uhut ma dibereng tu hambirang siamun, panomat pagokhon bangku na kosong i dope. “Opat nai kosong lae dah, sewa dalan ma buat annon, jala olat ni Doloksanggul do sude panuppang on” ninna supir raun on, huhut dilean rekap trip on.

Nda songoni do porsuk-tabona na mamboan motor on, anggo so pola adong nanggo lima halak sewa dalan, dang nanggo suang pasimiak. Nunga piga taon amanJamordong na manupiri sampri i, Pakkat- Medan mulak lao. Molo sian Pakkat dimanogotna i, mulak botari ma muse ibana sian medan. Dihaburjuhon ibana do namanupir i, ai holan i do nabinotona. Hea do didok simatuana ada martiga-tiga ibana jala dilean modalna, alai dang boi madalan dohot denggan.

Sahalak naburju do amanJamordong on. Jala tutu, tung tabo do dihilala akka panuppang i dipamboanna, nang pe sega dalani, sai hira dalan ni horbo alai dang hassit gotting nasida. Sai dipapuji-puji do ibana. ” sude do supir i, na malo namboru, ai pamboan niba pe sarupa do dohot dongan” ninna ibana dukkon dipuji panuppang i ibana, di nalewat huta Arbaan.

“Imadah ito, iba mangahaphon” ninna inanta na huddul di acc i muse, jala dipangolohon akka panuppang na asing sian pudi.

Nunga marholom ari, jala nunga ro sibbbur. Dipahatop ibana ma pardalan ni motorna on, asa gira lewatan tobbak Simbahe on. “Atik boha adong sewa di Brastagi manang di Kaban jahe tahe ni pahatop ma jo” ninna ibana dibagas rohana. Tutu ma nian, dukkon sahat ibana di Kaban Jahe, adong ma muse lima nai panuppangna, sarobbongan. Hatop ma dihobasi ibana pamasukkon akka tas-tas ni sewa on tu bagasi ni sampri on. Nunga songon na lubbang di ahap ibana, tung sewa dalan pe manggohi. Ra, molo tung tuat innon manang na piga panuppang on, margatti dohot panuppang na asing, nga tabba setoran ninna rohana.

Sai las do rohani ni tokke na mida ibana, ala dang hea nanggo sahali pe margabus amanJamordong. Sadia na dapot sai dilehon do sude, maru do didok tokke i, “ai buat diho bere, aha boanonmu annon tu pahoppu i”

“Pallean ni tulang ma dah, mardomu argani sperpat ni motor nuaeng, asa hatop tagatti, rem na nang banna nga songon na sega tulang” ninna mangalusi. Las ma tutu rohani tokke i, ai dang piga songon amanJamordong, uhut ni i tor balga-balga do dilean tokke i songon pasisigaretna.

Sipata do dibaen ibana marlagu huria didalan i. Ise tutu naso ngolngolan dimotor molo nunga onom jom. Molo tung adong panuppang i, manakku-nakkui kaset jala molo adong pangidoan ni panuppang i taringot lagu ni motor i, tor hatop do dioloi ibana, bohama asa las rohani panuppangi.

Nunga robot ari, jala sada-sada panuppang i nunga tua be. Adong na Subbul, adong di Baringin nang ro di Pollung sahat rodi Doloksanggul. Digatti ibana ma muse lagu ni motor i, jala dibaen ibana ma naribur-ribur i, ai sahalakna nama sian Dolok sanggul, asa unang langaan ibana. Nangpe nunga sappulu minit ibana mamutar-mutar di Dolok Sanggul  mandiori panuppang, alai dang adong be na laho tu Pakkat. Dipadalan ibana ma motor on tu Pakkat jala huhut marende-ende gelleng sahalakna, panomat asa unang mondohongok ibana.

Dung lewat tobbak Matiti, dibereng ibana ma tu kassa sipion di hambirangna, jala toppu dibereng ibana sada namatua martujung-tujung na bottar. Hordit do rohana, alai dipapos ibana rohana na pamereng-merengon do ibana. Jala serbeng ibana tu pudi, dang adong agia hapa pe, kosong do motor i. Dung sahat tu Sosor Tabbok, dibereng ibana muse kassa sipion i, jala di ida ibana muse namatua nakkinon. Nunga songon na ro biarna, nga mallobok taroktokna. Di hojot ibana ma motor na on, asa tumibu dapot huta. Dibereng ibana ma doppak pudi, alai dang adong diida ibana jolma di bangku pudi i, kosong do motor i.

Sahat ma di Sibuluan, dibereng ibana muse doppak sipion i, di ida ma disidope opputta namatua on.

Dang toho be on, naruhana. Di gas ibana ma motor i, haru likka hian, pola do sai naeng mangaluppat mortor i didalan i. Di serbeng ibana muse tu pudi, alai dang adong i ida manang aha. Dipukka ibana ma tangiang, martangiang ma ibana dibagas rohana. “Padao ma nasa ula-ula ni sibolis, nasa jea Tuhan sian motor on” ninna ibana diparulahulakkon. Di ingot-ingot ibana ma muse aha na sala diulahon nakkinon, sian medan sahat rodi Dolok Sanggul. Ra, tikki na maradi ibana di golap-golap di tobbak ni Tele, mambolokkon kotoran, marsattabi do ibana. “Sattabi dah oppung” ninna rohana huhut ma sai diingot-ingot muse akka na asing.

Digas ibana ma muse motor on, sa likka ni naboi motor i. Nga tarida be huta OnanGanjang. Diserbeng ibana tu pudi muse, diida ma namatua namartujung-tujung i huddul apala pas bangku partonga ni motor i.

Toppu ma dipaso ibana disada lapo dihutai, manimbuk ma ibana tu luar, marsurak ma ibana. “Tolong….tolong…jora…jora…begu….begu…” ninna amanJamordong. Humordit ma piga-piga halak nadilapoi marlojong doppak motor i. “Aha namasa” ninna nadeba

“Begu..begu…bereng jo tulang, adong begu di motor han” ninna amanJamordong huhut ma dibukka nasida pittu pudi ni motor i.

“Aha i, aha namasa, didia begu, basa maradi motor on…” tor toppu ma marsoara inanta namatua i, jala tong humordit rohana, hatop ma tuat tu toru, manukkun namasa.

“Ah…..ai hodo i hape oppung, sai pinikkir nakkinon begu,…”

“Begu??”
“Olo…ai hodo hape i, hurippu sahalakku nama di motor on”
“Bah…ai au do maksudmu hape begu?, babaniamamma begu….dao-dao ma nasosuman” ninna inanta namatuai, huhut ma muruhan, marbete-bete ibana tu AmanJamordong ala didok begu.  Dung  i, disuhuthon amanjamordong aha namasa gabe mekkel ma na salapo i.

Dang lao rohani ni amanJamordong na adong dope panuppang ni motor i, dirippu ibana nunga tuat sude panuppangna. Jala inanta na matua i pe, dung sahat motor i di Doloksanggul, tor dipaodom ibana dipudi dibangku pajjang i., ai kosong jala nga mondohondok ibana.  Molo mandapothon huta, dungo inantai marnida nunga olat nidia motor i., sotung lopusan innon hutana.  Dung diboto dao nai, jala dang sahat dope, dipapodom muse. Ai di huta Parbotihan do inanta namatua on innon tuat. Sabbor!!