Anak Naminiahan…..

Leleng amanJamordong jonjong di anak ni balatuk ni jabuna, na naeng maruppak i. Mamikkirhon balos ni surat ni anakna siakkangan na jinahana ondeng. Boasa sai dohononna au rot u Jakarta?, ua nasida ma nian ro mandulo au, molo tung masihol ibana  dohot pahoppu I tu iba,  ninna ibana di bagas rohana. Diulakkon ibana muse  sahali nai manjaha apala surat na partoru I didok disi “ Bapa, nunga piga hali sai maos disukkun pahompum si Jamordong, kapan oppung dating ninna, jadi naruhakku, tinggalhon ma jo ulaon mi satokkin, ro ma ho tu Jakarta, hutongos pe anon ongkosmu tu halak ito NaiPadot di Medan”

Dua do ianakkonni OppuJamordong baoa jala sa maboru, ima nai Padot na muli tu berena kandung ima anak ni ibotona par Sitonong i. Ia  anakna nadua nari di Jakarta do mangaratto. Jala boi dohonon anak sijujurng baringin do ianakkon na I, tarlumobi ma amanJamordong, anakna sihahaan i. Molo sian arta nian, nunga boi ibana gabe sahalak pangaratto na marhasil ditano parserahan i. Tarida do tutu, molo tikki ari natal, sai manubbang do tu gareja di huta, sai anggo passi bidda ni oppuJamordong datung marnahurang.

Alai, nang pe nunga magodang pahoppu panggoaran I, dang hea dope OppuJamordong lao mangebati tu luat Jakarta on. Andorang tardidi pe siJamordong, tong do dang olo ibana ro tu Jakarta. Tung mansai godang do sidalian dibaen ibana. Ia OppuJamordong boru nunga tibu marujung ngolu, andorang metmet dope anakkon na tolu i.

“Dang hajua be on…” ninna dibagas rohana.

Dibalik bulanna, lao ma ibana mangebati pinopparna, jala mamereng sude pandaraman ni amanJamordong, nang songoni AmanTolop siappudanna i. Marasing do parnasipon ni amanJamordong tu amanTolop. Nang pe rupani nunga sai diurupi amanJamordong ibana, alai sai lalap do diparhassiton ngoluna. Tikki martokko ibana di Pasar Tanahabang, hona tutung do ugasanna. Dilaon-laon ni ari, dilean do dibana sada motor angkutan, hape naso panagamanna di loddos do anak nideba ujungna mandandangi.

Diboan amanjamordong do ibana mamereng sude namasa di Jakarta, mangan di restoran na arga, modom di hotel, ai ungngali ma modom dihotel sian di hutana di DolokSanggul hape, riddop I, ninna ibana di roha.

“ Ai didok jolma I mohop di Jakarta, hape dia ma neh,….ngali hian do, maru ikkon marbulusan iba molo modom” ninna ibana.

Dibalik arina, diboan muse mardalani tu Ancol rodi tu Taman Safari, sude ma tahe, jala dang hatinggalan laho manuhor baju dohot sipatu na arga jala na jeges, pola do gok koper na I sude baju na imbaru.

“Papuas ma bapa namarJakarta i, on ma nanidokna Jakarta” ninna AmanJamordong

Dibodarina I, dung sidung mangan nasida di sada restoran na arga di Kelapa Gading, didok oppuJamordong ma asa marsogot di jabuni amanTolop ma jo ibana manang na piga borngin andorang so mulak tu huta.

“Imadah anaha, ai dang suman molo so sian jabu ni anggim iba nanggo pola piga borngin on, jadi naruhakku tusi ma jo au marsogot”

“Nauli bapa, hutaruhon pe ho tusi, ido tutu sumanna”

“Laos sian I ma au mulak tu huta, huboan hian ma sude baju-bajukku tusan”

“Olo bapa, alai dua borngin nai ma jo dah, asa sombu sihol ni pahoppumi” ninna ManaJamordong huhut dibereng tu si Jamordong na sai tangging di abingan ni oppungna.

“Ipe taho…balissan dison iba” ninna ibana, huhut ma nasida marsuhut-suhutan di restoran i.

Marpikkir do amanTolop dibagas rohana, ai aha do baenon pasonakkon natua-tua on, ai nunga polar o mangebati iba. Sai ditagi rohana mamboan tu akka siberengon di Jakarta on, alai sundat, alan di suhuthon oppuJaomordong do naung diaot-aothon ibana di klota na ribur on.

Jala ia boanaon tu MALL, nunga godang dituhor sian I jala tong do disuhuthon oppuJamordong naung lao nasisa belanja sian mol na bolon di Jakarta.

Botarina I, tikki marnonang-nonang nasida nadua manaringoti parngoluon on, diarahon amanTolop ma ibana lao minum tuak na tonggi buatan ni paberik tu sada kode tuak, diboto amanTolopan do attar boi dope oppuJamordong minum tuak.

“Tu kode an ma hita bapa minum bir, mangaso-mangaso ma jo satokkin, sai dijabu bapa, anon bosan,…”

“Adong kode tuak di kota on??

“Adong bapa, jala mambege-bege lagu batak”

“Ima tutu, atik boha pajuppa dohot artis batak I anon disi…” ninna oppuJamordong

Diboan ma oppuJamordong tusada kape batak di Jakarta Timur, minum bir ma nasida nadua. Tohodo, molo dikape on sai pittor ro do pelayan ni kape I, anak boru mandongani jala pittor huddul dilabbung ni oppuJamordong. Massiberengan nasida nadua, jala diboto amanTolop do nadiorhana i.

“Songoni do bapa dison, asa adong mandoingani hita minum,…” ninna nasida.

Tabo ma attong nasida nadua na minum bir I, jala sai hapit ma anak boru on dijolo ni oppuJamordong, sipata songon na dihaol otik sipata sai dibereng, jala mogap ma pakkilalaana manganggu uap na hussus napinakke ni anak boru i.

“dagah tutu, angur ni boru-boru…” ninna ibana dibagas rohana. Ditogu anak boru on ma ibana marjoget tu jolo, jalap aula so diboto amanTolop do namasa i.

Dimanogotna i….

Renges dope oppuJamordong, ai nunga tahuak manuk nasida na mulak sian lapo parendean i. Didungoi ma ibana laho martugo.

“Bangunin oppung nak…” ninna AmanTolop tu si Tolop

“Iya pa, masihn tidur nya oppung…” ninna mangalusi, bohama namarumur opat taon, datung marroha dope I, alai ala disuru amongna, tor marlojong tu bilut I, huhut dihutur-hutur oppung na i.

“Iya oppung, sudah bangun kau, oppung??” ninna Oppu Jamordong

“Ngilut dagingku sude bah…”

“Mura do ubat ni I bapa, jolo martugo ma jo bapa..”

“imadah, songon naso lakku…”

“Attong martapian ma jo, asa lao hita tu parkusut an…”

“Ima tutu bah,…sotung so boi iba mulak marsogot…” ninna ibana muse.

Diboan ma muse oppuJamordong tu pijat repleksi na adong di kota I, jala tutu dah, asing do molo tukang kusut na dison. Ai dirippu ibana do songon nadi huta I, ai nunga namatua namakkusut I, ima oppunisiParulahan boru do. Holan I do na malo makkusut dihutana, jala molo ngilut dagingna tor sai dijou do oppunisiParulahan on. Namariboto dope nian nasida, jala nunga tarbarita anggo sahit loja-loja, ngilut ni daging do, sahali makkusut, tor mago do sude i.

Hape asing do molo tukang kusut na di jakarta on, akka anak boru na uli jala na jeges do, huhut muse labbok-labbok bohina dohot parekkelna. “urut ya pa, buka bajunya, semuanya deh.,…” ninna, huhut dilean lappin, ima kain sarung. Bah, naruhana, alai diulahon oppuJamordong ma I, ai pamotoanna songoni do namasa. Tabo ma ibana namangurut I dah, sipata do mallobok taroktokna molo apala margeser tukang kusut I, didok manukkap, dungi didok singgalak muse.

“Omna asa ibana, tabo nai namarJakarta on..” ninna ibana dirohana. Botul do anak naminiahan ho amaniTolop bah, diboto hodo pasonakkon natua-tuam. Anggo baju na imbaru I, sipatu na arga I, sude na I dang boanon mate I, sonang ni roha I do, NINNA IBANA.

*      *      *

Marroan be do hombar jabuna dung diboto naung mulak oppuJamordong sian Jakarta, songoni do namasa di huta I, massisukkunan be do.

“Ai pajuppa do hamu dohot berem??…jonok do nasida dohot tulang naposo siappudan ni” ninna oppuTalhun apala naujjonok sian hombar jabu I, manukkun ala di Jakarta do tong tolu anakna.

“Sabas diahap ho na mangaratto I bah oppu ni si Jamordong” ninna OppuTalut muse sian uluan an.

“Martua ho, anak naminiahan pinopparmu” ninna amaniTagas, naupposona.

“Sonang ho dibaen amanJamordong I ateh amangboru” ninna OppuHumirlap, diboto nasida pasti amanJamordong do pasonangkon amongna I, ala ibana do soiparadongan

“Imadah lae, holan amanTolop on do napasonang rohakku”

“Boasa??”

“Toe ma nian, anggo amanJamordong do, holan napaloja-lojahon badan do I, nion do siappudankon, amanTolop, anggoi anak ni amana ma I, anak na miniahan, sai tor diboto do nadirohai,…” ninna huhut mekkel supping ibana molo di ingot nadiparruderudean i.