AmanJugul…oh amanJugul

Songon hata patujolo nabiasa, ima asa unang adong na murhing bohina molo hona tu suhutan on ateh, denggan-denggan hita, ndang na sangajo iba marsuhutan alai bohama….

Sahalak ama-ama naposo namargoar amanJugul. Nian holan gelar-gelarna do dibaen i, anggo goar sa tohona si Johannes do, alai ala dang suman pangalaho tu goar, gabe diganti akka donganna sahuta ma goar ni amantaon AmanJugul. Anggo sambolus berengon nian ibana dan apala na toho jugul ibana, alai molo nunga niakkupan manghatai, olo do gabe pingkal ate-ate ala olo sulpak-sulpak manghatai.

Dinasahali dah, dialo ibana ma sada natua-tua marsatur, biasama molo parsaturon ni halak hita, olo do gabe mohop ate-ate, molo talu sahali sai naeng do muse main paduahalihon pinomat laho mambalos hataluan i. SIan na main sapalat, olo gabe sampulu palat. Pintor didok ibana do ” Aha on…gossap do, manang horbo??” maksudna adong do partaruan gocapan manang holan na main sambing. Holan dibege alona songoni, sai songon na mangagai, pittor mohop do ate-ate i. Biasa na molo adong do alas ni parsaturon on, sai songon na naget-naget jala manat-manat do nasida padalanton anak ni satur on, agia sallakka unang salah, ai so boi di ulang. Ido parjanjianna. Olo do leleng  asa di dalanton aloni AmanJugul on satur na on, roma iba mandok ” A El Es…dohot jo bah, tu medan, sanga dope on ra asa mardalan satur on”. molo dang, olo didok “Molo naeng marsatur hita jolo boan bantalmu…” ninna. Ai gabe laos mohop ma rohani alo i.

Adong do bengkel ni ibana, ima bengkel kareta didok molo di medan, alai di jakarta didok ma bengkel motor. Nang pe na jugul bayon, jala nau-nau manghatai, sai godang do ro jolma marbengkel tu ingananna i, nian holan pangalahona do na jugul, anggo ula-ula ni tanganna, molo disi rohana i, hata ni hatadia, puas do anggo angka pelangganna.

Ro ma sada kedan tu bengkel i, jala didokma ” TUlang, angin dulu…..”
“Angin kau bilang?, jauh kali kau dari rumahmu cuman nyari angin ke sini, apa nggak ada lagi angin dirumah kalian lagi,..kau belilah kipas angin, biar banyak anginmu..”
“Ah..tulang ini, holan mambaen emosi iba do, kompes ban ni motor on, pompahon jo satokkin…”
“Dang adong pompa dison, kompressor do adong, boha ima hubaen??” ninna amanJugul on huhut ma disarathon salang ni kompressor i.

BAlik arina, ro ma muse kedan na asing, laho marbengkel, nunga ditogu-togu motor on, jala nunga hodokan ibana, haru malitap nama bajuna i ala ni hodokna

“Tulang, jama jo bah…”
“Nunga be…” ninna amanJugul huhut ma tor dijamahon motor i, “Aha dope…” diuduti sukkun-sukkun na i.
“Busi na i do sega ra tulang, padenggan ma jo….”
“Ai diboto hodo hape na dia na sega, ba padenggan ma…”Ninna amanJugul. Tor sip do jolma i, alai hatop do dikarejoi amanJugul motor i. Ai di ingot bayon, heado tong ibana marbengkel, tong do sarupa sungkun-sungkun i, ahana sega? dungi ala didok bayon, dang huboto on tulang bah…tor didok amanJugul do, “ai holan mamakkke do diboto ho, nanggo aha nasega pe dang diboto ho!”

Nang dijabu pe songoni di pangalahona tu niolina, alai ala nunga diboto hasomalan ni ibana dang pla diaben inantai be gabe bada, dipasip nama, jala sai didok, paubama rohami ale amang ni si ussok, sada tingki annon dapot ho do muse na unjugul sian ho angkupanmu.

Molo masa arisan, jala molo adong sibayaron, isarana  es pe pe ni dukakna sasada i, hape kalas dua es de dope, pittor didok do tu anak na i ” Tu  umak mu ma jalo, sai holan tu iba…”. MAnang molo masa arisan sai pintor didok do tu niolina i ” bayarhon ma dah, hodo sitiop puro, dang adong hutiop nanggo salimper.” Manang molo lao tu parmingguan, dimanogot na i didok ibana ma ” Dia jo hepeng gellengmi bah, durung-durung”.

Sahali dua hali, dianju inanta i dope alai sai lam dipamanat inantai, diboto ma ndang naso adong hepeng na, ai molo dijou donganna ibana laho mar-leng manang marjokker karo, pintor hatop do ibana lao tu jabu baribaan. Molo so i, molo godang donganna ro tu parbengkelan nasida i, jala adong manogihon minum bir, margugu be ninna, sai tor adong do berengon hepeng ni ibana pargossaapan i kaluar agiat pola opat lebbar.

Ujungna, ala sai mangido hepeng do bayon tu inanta i molo ari minggu manogot, manang laho tu dakdanak i, didok inanta ima, “ido…anggo marjokker karo dohot marleng adong do hepengmu, alai anggo tudurung-durung i, dang adong.”

Dialusi AmanJugulma, “Idodah…ai hea hupangido hepeng tuho lao marjokker karo manang marleng au? dang hea, alana anggo tunadua i husarihon do i, jala totop do adong i, alai anggo tu durung-durung dah, dang hea i…..”.

Disada borngin mulak ma ibana tujabuna, nunga songon na godang huroa di inum ibana bir on, jala nunga songon na dua pintu ni jabu i dibereng ibana. ujungna di tumpur ibana ma pintu i, jala marbongkol ma uluna i, hansitan ibana. Sahat ma tu bagasan jabu, di remengi inantaon ma ibana didokma ” Sai hantam na mium i, asa mateho, sampe ditombom ho pintu i, taonton disi, dang leanon be ho mangan…”

“Bah…ai boasa sai buretenganmu au, dang nanggo asi roham mamereng iba? nunga pola marbongkol ulu on, hape sai diremengi ho dope iba, dipingkir ho do tabo namabuk i? hancit do dah, naso hodo mabuk, suba  jo mabuk ho, asa diboto ho boha panghilalaan molo mabuk. NUnga mirdong iba, hape diburetengi dope…” ninna ibana huhut peak tupodoman i…

Ima suhutan ni amanJugul…..

Berita lain ...

• Dung Lam Matua…
• Dirimpu Rumbi
• MANGAN MANOGOT TINGKI SINGKOLA
• Jambar ni Parrasun
• HUTA HUTA DO HUTANAMI