Ai dison ma nian hita bere…

Oleh : Amani Harapan Marbun

Dang mandok nadia dah tu angka tulang niba si tigor roha, suhutan do nabinahen on nuaeng, goar dohot pangalaho, na tinukangan…..

Ai di ingot hamu dope tahe suhutanta ima taringot tu na bisuk songon ulok jala namarroha songon ulok di bulan-bulan na salpu di web ta on?. Ai adong dope udut ni suhutan i, jala tong do dongan sa parmeaman ni tokoh cerita i, goarna ima si Bisuk. Jala on do na mamboan si Tikkos tu jabu ni amang boruna i.

Tong do songon goarna i, ia si tikkos, ima naburju do ibana, jala tong do ngalobian bisukna songon ulok i, holan bedana dohot donganna ima molo si Bisuk on, marroha na denggan do. Nang diparsingkolaan na pe na malo do ibana. Burju do marnatua-tua jala sioloi ajar ni amana sioloi poda ni inana. Tung mansai balga do baga-baga ni amana nian naboi dapoton ni keluarga i sian ibana. MArdomu ibana do anak sihahaan.

Andorang so tammat dope sian kuliah na, nunga jalo di pangido angka perusahaan i ibana karejo, siala hapistaronna. Jadi dung di wisuda ibana, pintor hatop do ro ibana mandapothon perusahaan naung manjalo ibana. Nung sahat nasida tu jakarta dohot donganna si Tikkos, pittor ditahi rohani si Bisuk ma tu jabu ni tulangna. Dung tuat nasida sian bus di terminal Kampung Rambutan, hatop ma nasida mambuat angkot laho manopot tulangna, ai ido poda ni amana dohot inana, molo dung sahat tu jakarta, tor lao ma tu jabu ni tulang, jala molo boi disima marborngin nian saborngin, patuduhon naung sihol rohana martulang.

Diboan nasida nadua ma tasna nabolon i.

Dung sahat nasida tujabu ni tulangna, ditomu tulangna do di pintu ni jabu i, alai songon na hurang do idaon anggo berengon sian bohi ni tulangna di haroro nasida. Dang tor minar bohini tulang na on manjalo nasida, suang songoni nantulang na on pe, dang tor dihumalaputi mambaen angka nahombar molo ro tamue. Tarlumobi i ida tulang na on, ro nasida nadua mamboan tas nabalga.

Rodo tu pingkirang ni tulang na on, “Bah…nga ro bereon, diboan muse donganna, na laho dison nama halakon naeng tinggal? na tambah mangarepoti annon, hape bohama na baru mangaranto, ampe tu au ma sude innon parngoluon ni halakon nadua.”

“Tu son ho bere, pasombu ma jo disi tas mi, annon pe tapature i, jolo hundul ma jo, minum tes manis, hope dah nantulang ni si Bisuk, baenton jo si inumon i, na ngali i ma baen, nga loja halakon” ninna huhut ma lao inanta i tu dapur.

“JAdi nabaru sahat pe hamu bere?

“Olo tulang apala ipe hian, jala sian terminal do hami langsung tu jabu on, songoni do poda ni nainang, jala sahat ma tabe nasida tu hamu, hipas do nasida nang ompung pe dihuta.”

“Imadah bere, jadi nunga tammat hamu singkola ateh, naeng mangaranto nama hamu bere?”

“Olo tulang….”

” Imadah bere, ai porlu do leanon tu hamu bere songon angka poda, angka naung nialaman najolo andorang baru ro iban mangaratto tu Jakarta on, ai songoni do bere, ikkon tahan do iba marporsuk-porsuk jolo, olo mangurupi angka ulaon ni pamili nanidapothon, jala nunut karejo, nunut mambaen angka lamaran karejo, unang marna saep roha…ai bere ma bere, hami pe songoni do, tong dope marposruk-porsuk, mangontrak dope…”
“Olo tulang ….”

“Alai nang pe songoni bere, bah rap dison hita marporsuk-porsuk…”
“Daong tulang,….ai harorongku tu Jakarta on ima siala naung dijalo do au karejo di perusahaan PT. Nabalau di Bekasi, jala dilehon do songon inganan MESS di hami, jadi holan saborngin do hami dison tulang, holan na pasombu masihol do au tu Tulang”

Holan didok si Bisuk songoni, naung dapot karejo hape ibana jala dang tinggal di jabu i, tor minar ma bohi ni tulang na on, tor songon na las ma rohana idaon, jala songon na marpangassi ma ibana tu bere na on. Ai dang hape na lao tinggal di jabu nasida, jala ndang na pengangguran be nasida ro tu jakarta on, tor songon na dipajonok ma tu bere na on didok ma,

“I do hape bere? alai anggo ninna rohakku nian bere, dison ma hamu nian tinggal, ai dang pola dao sian on inangan karejo mi, adong dope kamar kosong sada nai. Dang tor lao iba mamulik-mulik mangontrak sandiri molo adong dope au dison tulangmu, ikkon dison ma nian ho bere” ninna tulang na on, songon pataridahon na burju ibana, ai arop do rohani tulang na on asa suhuthonon ni si Bisuk, naburju do tulang na on. Ai tontu paboaon ni si Bisuk ma tu huta, nasai ditiopi tulang na ibana disi, dungi angur ma tahe goarni tulang na i.

“Ate, lae…boaha molo dison hamu nadua tinggal??” ninna muse menukkun tu si Tikkos dongan ni sibisuk.

“Anggo di au tulang, dia ma na denggan…” nina si Tikkos, huhut dibereng tu si Bisuk.

“Daong tulang, iban na baru masuk karejo i, jadi tudia ninna perusahaan i tu si ma jo iba…jadi mangantusi ma tulang, ndang naso roha martulang iba….” ninna si Bisuk mangalusi tulang na i

“Attong molo songoni, agiat pala saborngin on ateh,…toe nantulang n sibisuk, baethon ma jo sipanganon i, asa nahumatop i ma baen, sian lapo an ma tuhorhon….” ninna.

“Jot-jot ho ro bere tujabutta on dah, nang pe dao hamu sian hami, alai ingkon iba dope mamereng-mereng hamu dijakarta on….” ninna tulang na i andorang simpul nasida mangan jala hobas laho tu podomanna be.

Dimanogot na i, antong dihusiphon si Tikkos ma tusibisuk, ninna ” Imadah, lae, marlaba do lae bah, burju na i hape tulang muna i, ai adong dope hape di Jakarta on songoni daoot keluarga atehe, sai di tiopi hita daba disi, jala songon na lomos rohani tulang ta i tuhita molo tinggal dao hita sian ibana…”

“Ah…ai dia do laeon, dang mangantusi…iban na so disi do tinggal hita, asa songon na denggan do idaonmu, dungi hatahononta manian tuangka pamilitta nadihuta, na jolma naburju do ibana marbere…nunga hutanda tulang lae…”

“MAksud ni lae….???”

“Olo,..beta ma neh…..” ninna si tikkos tu donganna.

Berita lain ...

• Dung Lam Matua…
• Dirimpu Rumbi
• MANGAN MANOGOT TINGKI SINGKOLA
• Jambar ni Parrasun
• HUTA HUTA DO HUTANAMI